Music Video thar nen Peter Lalnunpuia

Mizo Idol 2018 aṭanga Mi­zoram mipui ten kan hmelhriat, Chanmari West tlangval Peter Lalnunpuia music video hmasa ber 'Tlang lamah khian' tih chu zanin hian Zonet channel-ah hmuh leh ngaihthlak tur a awm dawn ta.

Peter Lalnunpuia hi Mizo Idol 2018 aṭang khan a zaithiam zia kan hre tawh a, a music video thar tur pawh hi en a chakawm tawh hle.

'Tlang lamah khian' tih hla hi BS Vanlalvena lehlin a ni a, Mizo Idol contest third round-ah khan a lo sa tawh bawk. Beidawn chang te awm mah se hmalam pan zel tur kan nihna lam tarlanna hla a ni a, hla ṭha tak a ni.

A video hi Tea video produc­tion kutchhuak niin recording hi Studio A16-ah tih a ni a, Thangboiha'n track hi a siamsak bawk.

Peter-a chuan a music video thar tur hi Lalengmawia hriatreng nan a hlan thu a sawi a, nimin lamah khan MDM library lamah dahluh a ni tawh bawk a ni.