Priyanka film siam chhuah hun tichiang ta

Priyanka Chopra-in Sikkim film a siam hmasa ber, Pahuna -The Little Visitors tih chu December 7 hian theatre hrang hrangah chhuah a ni dawn ta.

He film hi naupang pathum, Nepal tualchhung buaina avanga an nu leh paten an tlanchhiatsan hnua an khawsak dan leh, an intunnun chhoh dan tarlanna a ni.

Pahuna -The Little Visitors hi Priyanka leh a nu Madhu Chopra ten Purple Pebble Pictures hminga an siam a ni a, Children’s Film Society, India (CFSI) nen an thawkdun a, Paakhi A Tyrewala chu director a ni.

Film hlimthla hi nikum May thlaa Cannes Film Festival-ah tihlan a ni tawh a ni. Madhu chuan, " He film hi a special bik hle a, a chhan chu puitlingten thutlukna harsa leh khirh tak an siamin naupangte laka nghawng thui tak a neih dan a tarlang a ni", a ti. "Khawvela chen chhung chuan beidawn maite a awl ṭhin. Hetihlai tak hian beiseina nung neih hi kan mamawh ber a ni. Film-a changtu pakhatin a sawi angin, 'A thim vek lo a, eng a lo awm ve zel a ni'. Pahuna film hi beiseina lantirna niin, hei hian entu mipui naupang leh puitling zawkte rilruah pawh nghawng a neih phah hle ang. A film siamna ram ngeiah tlangzarh a ni thei dawn a ni", a ti.