Daddy Yankee-a'n rimawi chawlhsan dawn

Daddy Yankee chuan rimawi a chawlhsan dawn thu a puang.

Reggaetón star, a hming tak Raymond Ayala hi kum 2004 chhoah khan 'Gasolina' chu larpuiin Latin music huangchhungah phei chuan vawiin thleng hian a 'ber' zinga mi a ni.

Kum 2012-a 'Prestige' album a tihchhuah hnuah khan Daddy Yankee hian studio album dang a tichhuak leh tawh lo a, tunah hian kum 10 hnuah album thar 'Legendaddy' a tichhuak dawn a, chumi tihlarna ni pah fawm chuan ram hrang hrangah tour a nei ang a; chumi zawh hnuah chuan rimawi chawlhsan a tum niin Billboard chuan a tarlang.

Daddy Yankee chuan Pathianni khan thuchhuah siamin,"Vawiin hian, rimawi ka chawlhsan dawn thu bakah ka production ṭha ber leh concert tour ṭha ber ka hlui dawn che u tih ka puang a ni," tia tarlangin,"Kum 32 tawnhriat ka neih tawhna hi he collector item thar, Legendaddy album hmang hian ka mangṭha dawn. Ka nihna tichiangtu style hrang hrang chu he album pakhat hmang hian ka hlui dawn che u a ni," a ti.

'Legendaddy' album hi March 24, Ningani lo awm turah hian a tlangzarh ang. A world tour neih tur hi August 10 hian Portland, Oregon-ah a khuh hawng anga. December thleng concert hmun hrang hrang neiin zinkual a tum a, chumi hnu lamah chuan rimawi khawvel chhuahsan a tum ta a ni.

Latin rimawi mi ropui Daddy Yankee
"King of Reggaetón" tia an sawi ṭhin Daddy Yankee hi kum 45 lai a ni ve tawh a, ram hrang hrangah album copy maktaduai 20 chuang hralh tawhin Latin music artist-ah chuan album hralh tam ber pawl a ni.

A studio album pathumna 'Barrio Fino' phei kha chu a hralh hnem lehzual a, kum 2000-09 chhunga Latin music album hralh tam ber a ni hial. Kum 2017-a Latin pop singer Luis Fonsi nena an tihchhuah 'Despacito' phei chu a lar zia sawi nawn vak pawh a ngai lo. Ram kil khawr berah pawh kal la, an lo hre ngeiin a rinawm.

Daddy Yankee hian chawimawina 184 vel a dawng hman a, chung zingah chuan Latin Grammy Awards panga a tel a, Billboard Music Awards pahnih leh Billboard Latin Music Awards 14 lai a dawng tawh bawk.

CNN chuan kum 2009 khan "Most Influential Hispanic Artist"-ah a puang hial a, kum 2006 khan Time 100 list-ah a lo tel tawh bawk a ni.