'Lion King' Trailer in viewer ngah Darkar 24 chhunga entu ngah ber dawttu

Disney chuan kar liamta November 22 khan 'Lion King' trailer a tichhuak a, darkar 24 chhungin viewer maktaduai 224.6 a nei hman a, tihchhuah anih aṭanga darkar 24 chhunga viewer ngah ber dawttu a ni.

Disney in 'Lion King' a siam thar tur hi live-action(CGI) a ni dawn a, nikuma Avengers: Infinity War trailer tihchhuah anih khan darkar 24 chhungin viewer maktaduai 238 a nei hman niin Disney Studio chuan an tarlang.

'Lion King' hi animated version in 1994 khan tihchhuah a lo ni tawh a, en a hlawh hle a, vawiin thlenga naupang te hmuhnawm tih a la ni reng a, tuna live-action version chhuak leh tur pawh hi a nghahhlelhawm tawh hle a ni. Disney chuan social media lamah most-viewed Disney trailer debut record siam theia Lion King a awm chu lawmawm an tih thu leh an inchhuanna a nih thu an tarlang a ni.

Lion King tharah hian Beyonce chuan a aw a thawh dawn a, Nala aw-ah a aw hman a ni dawn a ni, Donalh Glover aw pawh Simba aw-ah hman a ni dawn bawk. Anni bakah hian James Earl Jones, Seth Rogan leh John Oliver-te pawhin an aw an thawh bawk.

Trailer hian fak a hlawh hle a, animated version nen pawh a inzul hle tura ngaih a ni. Nakkumah tlangzarh a ni ang.

Lion King bakah hian Disney hian Dumbo leh Aladdin live-action movie an tlangzarh dawn bawk a ni.