'Eléison Zahngai Rawh!' a chhuak ta

Zonet Original Series 0389 buatsaihtu 'Believing Is Seeing Project' leh K&P Entertainment ṭangkawp chuan film tawi thar “Eléison Zahngai Rawh!” an tichhuak.

He lemchan tawi hi tunlai khawvelin a buaipui em em, mahni anpui kawpna (LGBTQ) leh sakhuana inkungkaihna thua hmeichhe pahnih thil tawn leh an rinna fiaha a awm chanchin a ni a, en a manhla viau ang.

Director Raymond Colney chuan, “Brandon Teena inspired film a ni a, mahni nun lak duh hial khawpa beidawnna tawpkhawk Rini leh Zoi-te'n an tawn dan leh sakhuana leh rinnain a hawisan tawh hnua Rini chuan a hnuk a chah hmaa chhandamna a zawn dan chanchin a ni. Entute'n thutlukna an siam tur atan a tawp khar a ni,” tiin an film thar chungchang chu a sawi.

'Eléison Zahngai Rawh!' hi thawnthu hrang hrang panga, a taka thleng lakkhawm a, awmze nei tura siam pum a ni a, Kum 2016-a Raymond Colney leh Siddhartha Dutta te ziah dun a ni. An duhthu a sam theih ṭhin loh avangin tun hi vawi hnih an shoot ṭhatna a ni nghe nghe. Maruata Rawite (0389 & Hnehtu) kan hmu leh dawn a, ani bak hi chu hmel thar vek an ni dawn thung.

March 19 aṭang khan Folkland-ah an chhuah ṭan tawh a, Zirtawpni thleng hian dar 2 -7 PM-ah, ni tin an chhuah ṭhin dawn a ni. 5.1 Surround Sound a mix niin, ticket hi Rs.100 a ni a, a hmunah leitur a awm nghal. March 25 zan aṭangin Lersia Play-ah en theihin a awm dawn bawk.