Kum 2021-a khawvel music market hlut zawng $tld 26

Kum liam ta, kum 2021-a khawvel music market hlut zawng $tluklehdingawn 26 a ni.

Nikum chhung khan kum hmasa leh lam aiin khawvel rimawi bazar hlut zawng chu 18.5% laiin a pung a, 1990's hnu lama a san ber ṭum niin an tarlang. International Federation of the Phonographic Industry (IFPI) chuan kum sarih chhung a zawnin khawvel pum rimawi bazar hlutna hi a pung tawh niin a tarlang ve bawk.

Streaming platform vangin nasa takin khawvel pum rimawi bazar hlutna hi a pung a, paid subscriber maktaduai 523 lai awmin kum 2020-ah chuan mtd 443 an awm a ni. Streaming hian revenue zawng zawng aṭanga 65% lai a huam a, CD, Vinyl leh cassette belhkhawm chu 16% ni thungin download chu 4% a ni ve bawk a ni. A la bang 11% chu royalty payment-te, film-a music license an neihna aṭangte a nih bakah TV Show leh advertisment aṭangtein a ni thung.

IFPI chief executive Frances Moore chuan kum 1999 hnu lamah kha chuan rimawi market chu 40% laite'n a tlahniam hman tih sawiin nikum report erawh an beisei phak bak a nih thu a sawi a, ram 60 aṭanga 70 inkar vela report an dawn aṭanga data an siam a ni tih leh chung ram zawng zawngah chuan rimawi market a ṭhang vek tih a sawi.

Kum 2000 hnua a vawi khatna atan CD hralh a pung a, vinyl aṭanga sum an lakluh phei chu 51% laiin a pung a ni.

Nikum chhunga rimawi market hlutna a pun chhanah hian Taylor Swift, BTS leh Adele-te chuan an thawh hlawk hle niin an sawi a, anni hian nikum chhung khan an rimawi an hralh ṭha hlawm hle a ni. BTS-te hi nikum chhunga artist music hralh ṭha ber an ni a, Taylor Swift chuan dawtin Adele chu pathumna a ni ve bawk.