'The Batman'-in ro a rel chhunzawm

Box Office-ah 'The Batman' bawkin ro a rel chhunzawm a, a sum lakluh pawh a tam fal leh viau.

Kar thumna hnuah pawh 'The Batman' bawk
Tlangzarh a nih aṭanga kar thum a liam hnuah pawh North America Box Office-ah chuan 'The Batman' bawkin sum a lalut tam leh ber a, a sum lakluh pawh a tam fal viau.

Kar tawp liam ta chhung khan theatre 4,302-ah chhuah a ni a, $36,723,197 lai sum lalut lehin North America Box Office aṭang ringawt pawhin 302,863,177 lai sum a lalut tawh a, ram dang aṭangin $300,400,000 lalut tawh bawkin a sum lakluh tawh zawng zawng chu $603,263,177 lai a ni tawh.

Warner Bros. DC superhero film, Robert Pattinson, Zoë Kravitz, Paul Dano, Jeffrey Wright, John Turturro, Peter Sarsgaard, Andy Serkis, leh Colin Farrell-te channa hi kumin chhunga film tlangzarh zingah chuan sum lalut tam ber dawttu a ni a, 'The Battle at Lake Changjin II' chu sum lalut tam ber niin $632,660,000 a lalut tawh a ni, Mahse, tun ang renga a sum lakluh a pung chak a nih chuan sum lalut tam ber a nih thuai a rinawm.

Pahnihna 'Jujutsu Kaisen 0: The Movie'
Japanese animated film 'Jujutsu Kaisen 0: The Movie' hi kar tawp liam ta khan theatre 2,286-ah chhuah a ni a, $14,818,624 lalutin North America Box Office-a sum lalut tam ber dawttu a ni mek.

He film hian US pawn lam aṭangin $115,155,856 a lalut tawh bawk a, a sum lakluh tawh zawng zawng chu $132,854,533 zet a ni tawh.

Top 10-ah film thar a awm nual
Top 5-ah film thar pahnih a awm a, 'Jujutsu Kaisen 0: The Movie' bakah hian palina 'X' chu film thar a ni bawk. Pariatna 'The Outfit' leh pakuana 'The Kashmir Files'-te chu film tlangzarh thar an ni ve bawk. Top 10-ah film thar pali lai a lang.

Box Office Mojo chart-ah film 43 tarlan a ni a, 'Umma' (11), 'Alice' (14), 'Jane by Charlotte' (13), 'Ahed's Knee' (40), 'Laleh Drive' (42) leh 'The Torch' (46) te chu film thar an ni bawk.