Tamil Nadu sorkarin Pawisa inchawia online game khelh a khap
Tamil Nadu sorkar chuan pawisa chawia online game khelh khapna dan thar a siam a, he dan bawhchhia hi chu kum hnih thleng tan-inah an tang thei dawn a ni.
Dan thar an siam hi bawhchhia an awm a nih chuan tan-ina an tan bakah hian pawisa Rs 10,000 thleng an chawi thei dawn a, hemi chungchang hi Governor Banwarilal Purohit chuan Zirtawpni khan puangin state sorkar rawtna anga siam a nih thu a sawi a; Chief Minister K Palaniswami pawhin hemi chungchangah hian hma a lak dawn thu a lo sawi tawh bawk.
Tamil Nadu bakah hian Andhra Pradesh pawhin tunhnai lawk khan online game ṭhenkhat pawisa inchawi theihna ang chi leh pawisa khelhna atana hman theih ang chi chu a lo khap tawh a, Union Territory Puducherry pawhin sorkar laipui hnenah hetianga hmalakna tur dil hian lehkha an lo thawn tawh bawk a ni.
Online game vang hian India ramah mahni nunna la an awm zeuh zeuh tawh a, Tamil Nadu-ah pawh hian game khelhna aṭanga pawisa hloh vanga intihlum tunhnai lawk khan an awm a, chumi vang chuan an state sorkar hian dan thar hi a siam ta niin an tarlang.
Madras High Court Madurai Bench pawhin online game chungchuangah hian thubuai ngaihtuah mek an nei a ni.
Report ṭhenkhatin an tarlan dan chuan tunthla chhungin Coimbatore-ah online game khelhna aṭanga pawisa hloh vangin mi pathum an intihlum tawh a, state sorkarin police act siam ṭha tura rawtna a thlenah pawh online gaming vangin pawisawi lo nunna, a bikin kum naupang lam chuan an tawrh thu tarlangin an intihhlum phah hial tih an ziak a, chutiang thil chu a thlen tawh lohna turin dan chu siam ṭhat a ngai niin an ziak.
Tamil Nadu sorkar hian an dan siam thar chu bawhchhia an awm a nih chuan Rs. 5,000 chawia thla ruk tan-ina tan emaw, Rs 10,000 chawia kum hnih tan-ina tan theihna tur hremna an siam a ni.