'Inpeih a hun' Remruata hla thar zaninah

Lengzem khawvelah hming a chher hnuah, Gospel lamah hla ropui tak tak 'Amen! Silfai ka ni' tih hmangin kawng thar a rawn sat a, tunah Zoram mipuite inpeih turin min au leh ta. Remruata chuan tunlai khawvela thil thleng mekte ngaihtuah chunga Pathian a pawlna chu hla hmanga puang chhuakin, 'Inpeih a hun' tih music video chu a peih a, zanin hian Zonet lamah tihchhuah a ni ang.

'Inpeih a hun' hla a phuah dan hi Remruata chuan hetiang hian a sawi: "India leh China innghirnghona te, tunhnaia lir nghing fo mai leh hrileng mekte ka ngaihtuahin, hengte hi Lal Isuan huntiam a thlen dawn hnaiha a thleng tur a sawi hrang hrang nen khan a inhmeh hle mai a. Heng vel ngaihtuah leh ka ṭawngṭai laiin  hla thu a rawn thleng a, ka ziak chhuak ta a ni," a ti.

"Khawvel thiamna leh hmasawnna hian ralthuam ṭha a hring a, chu chuan a kawh chu indopui a ni. Khawvel hmasawnna hian Mizoram pawh nasa takin min nêk a, kohhrana tel tho siin kan rinna erawh a dal tial tial a, Pathian awm pawh kan ring meuh ta lova, chu bakah sual tih kan pawisa chuang lo. Thiamna leh theihna sang tial tial mah se, hengte hian Pathianin huntiam a tih hi a dâl zo dawn lo a ni," a ti. "Khawvel thiamna, theihna leh hmasawnnaah hian thlamuanna a awm lo a, thlamuanna tak tak chu Isua Krista hi a ni," a ti.

'Inpeih a hun' video hi Zawma, Zozam kutchhuak a ni a, piano hi B-puia Zaiawi kuthnu niin, Maengan harmonica a hâm a, a ngaihnawm hle. Music dang zawng leh recording hi EME Records kutchhuak a ni.