DC Talk 'Jesus Freak' album-in kum 25 a tling ta

Kum 15 vel liam ta khan khaw­thlang ram chu sawi loh, helai hmarchhak kilkhawra state pakhat Mizoramah pawh 'worship dance' vel atana an hman lar em em mai hla pakhat a awm a, chu chu 'In the light' a ni. Chu chu Gospel band lar tak DC Talk-in Charlie Peacock-a hla an cover niin chumi hla awmna album 'Jesus Freak' chuan Inrinni liam ta khan kum 25 a tling.

Jesus Freak album hi  November 21, 1995 khan ForeFront Records kaltlangin DC Talk hian an tlangzarh a, an studio album dang nena khaikhin chuan a style a danglam deuh a,  a hunlaia lar tak grunge lam hawi niin an album hmasa ho aiin a 'rock' deuh zawk bawk. He album hi a hlawhtling hle a, Kristian rimawi huangchhungah chuan album huhang ngah ber leh ropui ber zingah mi tam tak chuan an chhiar tel hial a ni.

DC Talk hian 'Jesus Freak' album an tihchhuah hma hian hip-hop lam hawi album pathum an tichhuak a, Grammy hialte pawh an dawn hnuah an style thlakin Jesus Freak hi an tichhuak leh a, chu album-ah chuan theme hrang hrang- thlarau lam nun leh ṭhian inkar te bakah chi inthliarna leh Pathian awm ring lote chungchang thlenga tarlanna hla an dah.

'Jesus Freak' hi an hralh hnem hle a, RIAA double-platinum album a nih phak piah lamah kum 1997 khan Grammy Award for Best Rock Gospel Album a dawng hial. 

Billboard 200 chart-ah No.16 a ni phak bawk a, mainstream album chart-a Kristian rimawi hetiang dinhmun thleng phak hi 90's hnu lamah phei chuan an tam lo hle ang. U.S. Top Christian Album-ah phei chuan No.1 a ni hial a, single chart-ah pawh he album-a hlate hi an che ṭha hlawm hle.

Kristian album-ah chuan hralh ṭhat ber zinga mi a ni a, US-a double platinum a nih bakah hian Canada-ah chuan gold certify a ni bawk. Kum 1995-a tlangzarh a nih karah khan RIAA Gold certify a ni nghal a, US-ah ringawt pawh copy maktaduai 2 chuang an hralh a ni.

DC Talk hian an album hit silver anniversary pual hian kum 1995-a Michael Tait Vocal Session demo an tlangzarh loh chu tlangzarhin YouTube-ah an dah chhuak a, chutah chuan kum 25 liam taa album an record lai thlalak ṭhenkhat pawh hmuh tur a awm a ni.

Intihsiaknate pawh buatsaih nghalin heta a tiṭha zual 25 chuan limited edition box set vinyl copy leh Jesus Freak lehkhabu awmnate pawh an dawng thei a, heng an lawmman siamte hi lei theih turin an chhawp chhuak nghal bawk.

DC Talk-ah hian mi pathum an awm a, Kristian rapper lar tak TobyMac hi an rapper ṭhin niin Gospel band lar ber pawl News­boys-a an frontman ni mek Michael Tait leh Audio Adrenaline-a an lead singer Kevin Max Smith-te hi an ni a, vawiin thlengin khawvela Gospel artist lar ber zinga mi an la ni vek.