Harry Styles album thar tur ‘Harry’s House’

Grammy award hial pawh lo dawng tawhtu Harry Styles chuan Nilaini khan social media kaltlangin a studio album pathumna tur 'Harry's House' a tlangzarh dawn thu a puangzar a, May 20-ah tlangzarh a tum.

'Harry's House' album-ah hian hla 13 a awm dawn a, a album tihchhuah tawhte ai chuan hla a awm tam zawk dawn a ni. Hla awm turte erawh la puangzar lo mah se 'Watermelon Sugar' singer hian a cover art erawh a pho lang thung.

Hemi pah hian Styles hian second 40 leka thui album trailer a tichhuak nghal bawk a ni.

Kum 28 mi One Direction aṭanga khawvelin a hmelhriat hian kum 2017 khan a studio album hmasa ber 'Harry Styles' chu a tlangzarh a, kum 2019 khan a album pahnihna 'Fine Line' chu tlangzarhin heng a solo album pahnihte hi a hlawhtlinpui hle nghe nghe a ni.