2022 Grammy Inlan tur an puan belh zel

Rimawi tana zan ropui leh nghahhlelhawm Grammy Awards 2022 sem hun a hnai zel a, inlan tur pawh an puanzar belh zel e. Ningani khan he huna inlan tur artist panga puanzar belh a ni a, Jon Batiste, Foo Fighters, H.E.R., Nas leh Chris Stapleton-te chu an inlan dawn tih a chiang e.

April 3-a sem tur Grammy Award vawi 64-naah hian Stephen Sondheim hlate chu Cynthia Erivo, Leslie Odom Jr., Ben Platt leh Rachel Zegler-te chuan an perform dawn bawk.

Kumin Grammy hi nikum lama host Trevor Noah bawkin a host leh dawn a, MGM Grand Garden Arena, Las Vegas-ah sem tur niin Brothers Osborne, BTS, Brandi Carlile, Billie Eilish, Lil Nas X & Jack Harlow leh Olivia Rodrigo-te chu an inlan dawn tih an lo puangzar tawh bawk a ni.

Ningania inlan tur an puanzar belh zinga tel Jon Batiste hi kumin Grammy-a nomination hmu tam ber a ni a, 11 lai a hmu. Chung zingah chuan album of the year leh record of the year pawh a tel. H.E.R hian nomination pariat lai a hmu bawk a, Foo Fighters hian pathum hmuin Stapleton pawhin pathum a hmu a, Nas hian pahnih a hmu ve thung.

Nikum November 23-ah daih tawh khan nomination list hi puanzar a lo ni tawh a, Doja Cat, H.E.R., leh Justin Bieber-te chuan nomination pariat an hmu ṭheuh a ni.