Josephine Lalawmpuii'n hla thar tichhuak dawn

'Khep khep maia' hmanga Zofate min awitu Josephine Lalawmpuii chuan hun eng emaw chen hla thar a tihchhuah tawh loh hnuah hla thar 'Ka Luangliam' tih chu a tichhuak dawn.

'Ka Luangliam' hi Mizo lengzem hla ṭha tak tak phuah tawhtu John Mawitea leh Mapuii Fanai-te phuah a ni a, a mawi leh dawn tih a chiang. Music chu Tka Sailo siam a ni a, recording & backing vocal chu Ronald Zothantluanga (3 Bro-sis) a ni thung.

Josephine-i hla thar hi EDM future bass lam hawi a ni a, MDM Library lamah dahlut tawhin Zonet leh YouTube lamah thlira ngaihthlak theihin a awm thuai dawn.

Josephine Lalawmpuii hla tihchhuah tawhte hi a hit tlangpui a, YouTube lamah pawh thlirtu a nei ngah ṭhin a, nuai chuang viewer a nei thuai zel. Kum hnih vel liam taa a tihchhuah 'Khep Khep mai a' phei chuan thlirtu maktaduai 2.5 chuang nei tawhin a tihchhuah hunlaia Mizo hla lar ber pawh a ni reng ṭhin a nih kha.