Kum 2021 khan artist 130 chuang $mtd 5 chuang pe

Music Industry-a retailer thawh hlawk ber an ni hial em ni?

Music streaming giant Spotify chuan nikum khan artist 130 chuang hnenah $maktaduai 5 chuang ṭheuh an pe tih an sawi.

Spotify hian chung artist-te hming chu an puangzar loa, mahse nikum chhunga an streaming service-a artist hit zual zingah Bad Bunny, Taylor Swift, BTS, Drake leh Justin Bieber-te chu telin hming langsar ber ber pawh an ni a, hetihlai hian Olivia Rodrigo 'Drivers License' chu kum 2021-a hla stream tam ber a ni thung.

Thla tina hmangtu maktaduai 406 vel nei ang hiala chhut Spotify chuan music industry-a rights holder-te hnenah nikum chhung khan $tluklehdingawn 7 an pe tih an tarlang bawk a, chutiang a nih chuan music industry revenue 25% vel lai chu Spotify aṭangin a lut tihna a ni. Hemi chungchang hi Spotify chuan an company Loud And Clear Website lamah an tarlang. He website hi langtlang zawka an sum hman dan an puangzar theihna tura nikum lama an tlangzarh a ni.

Kar tir lamah khan IFPI chuan kum 2021 chhunga music market hlut zawng chu $tld 26 vel nia an chhut thu an lo puangzar tawh. 1990's hnu lama a hlutna sang lai ber a ni. Spotify report hi a dik a nih chuan music market hlutna atan hian an thawh hlawk hle. 25% lai chu an thawh tihna a ni ■

Paid subscriber mtd 180 chuang neitu Spotify hian artist 52,000 lai chuan an streaming service kaltlangin kum 2021 khan $10,000 chuang an lalut tih an tarlang bawk. Heng zinga 28% chuan TuneCore, Ditto, DistroKid leh CD Baby kaltlangin an rimawite hi an upload. Spotify lamin an chhut dan chuan, heng artist-te hian streaming service dang aṭanga an sum lakluh nena belhkhawm chuan kum liam ta chhung khan $40,000 chu an lakluh hman an ring.

Spotify hian mi maktaduai 8 velin an service-ah track an upload tawh tih sawiin, ni tin hla thar 60,000 vel upload thar a awm ziah bawk. Chumi awmzia chu, Spotify-a artist 99.3% lai chuan kum khatah $10,000 an lalut tling lo.

Loud And Clear website lama an tarlan dan chuan Spotify hian music history-a retailer pakhat, kum khata music industry-a sum thawh hnem ber niin an inchhal a, CD emaw digital download era emaw pawh nise anni aia thawh hlawk hi an la awm lo niin an sawi.

Kum 2021-a Spotify-a hla stream tam zual panga:-
1 Drivers License Olivia Rodrigo
2 Call Me By Your Name Lil Nas X
3 Stay The Kid LAROI
& Justin Bieber
4 Good 4 U Olivia Rodrigo
5 Levitating Dua Lipa

Spotify data, artist-te sum hmuh dan chu:-
Sl. No Artist zat Sum hmuh zat
1 130 $mtd 5 chuang
2 320 $2,000,000 - $4,999,999
3 590 $1,000,000 - $1,999,999
4 1,130 $500,000 - $999,999
5 7,330 $100,000 - $499,999
6 7,000 $50,000 - $99,999
7 36,100 $10,000 - $49,999