Foo Fighters drummer Taylor Hawkins a thi

A taksaah ruihhlo a awm!
American rock band lar ber zinga mi Foo Fighters drummer Oliver Taylor Hawkins chu Zirtawpni khan kum 50 mi niin a thi.

Grammy award hial pawh dawng tawh, Foo Fighters band chuan Zirtawpni khan an drummer thih thu hi thuchhuah siamin an social media account kaltlangin an puangzar a, "Foo Fighters chhungkua chuan hun lo taka kan hmangaih tak Taylor Hawkins a boral mai hi hrehawm kan ti hle. A rimawi thlarau leh a nui hmel chu kan thinlungah a nung reng tawh ang," tiin an tarlang.

Thil thlen dan chu
Associated Press lamin an tarlan dan chuan Zirtawpni khan Casa Medina hotel, Bogotá, Colombia aṭangin Hawkins hian awm na (chest pain) a neih avangin emergency call siam a ni a, damdawi lam thiamte a hmuna an thlen chuan Hawkins hi biak theih a ni tawh lo. CPR-te ti mah se awmzia a nei tawh loa, a hnu deuhah thia puan a ni zui ta a ni.

Foo Fighters hian South America-ah tour an nei mek a, Zirtawpni zanah pawh khan Estéreo Picnic Festival-a inlan tur an ni. Hawkins thih chhan tak hi puanzar la ni lo mah se a taksaah ruihhlo chi hrang hrang 10 lai a awm niin Colombian investigator-te chuan an sawi. Chung zingah chuan opioids, marijuana leh ruihhlo dang eng emaw zat a tel a, anti-depressant pawh a tel a ni, an ti. Hei hi a thih chhan a ni kher em tih erawh an sawi lo. Colombian attorney general office chuan thil awmdan an chhui chiang mek tih an sawi bawk.

Drummer ropui Hawkins
Taylor Hawkins hian kum 1997 khan Foo Fighters band hi a zawm a, studio album pariat lai a ho hian an tichhuak hman a ni.

Foo Fighters-a a tel hma hian Sass Jordan leh Alanis Morissette-te tan khuang a pu ṭhin a, progressive experimental band Sylvia drummer-te pawh a ni ṭhin bawk. Foo Fighters piah lamah hian kum 2004 khan a side project, Taylor Hawkins and the Coattail Riders band dinin drummer a nih bakah a zai ṭhin a, studio album pawh pathum lai an tichhuak tawh nghe nghe.

Nikumah khan Foo Fighters lama a band member dangte nen Rock and Roll Hall of Fame-ah lakluh an ni a, kum 2005 khan British drumming magazine 'Rhythm' chuan Best Rock Drummer-ah a lo thlang tawh bawk.