Oscar Awards 2022 ; Best Actor Will Smith-a'n Chris Rock a béng!

Dune-in award a dawng tam bera, paruk lai a dawng. Award ngaihhlut Best Picture dawngtu CODA

Academy Awards vawi 94-na chu Pathianni zan khan Dolby Theatre, Los Angeles-ah sem a ni ta a, Sci-fi film 'Dune' chuan award paruk dawngin award dawng tam ber a ni a, Best Picture award chu 'CODA'-in a dawng thung. Kumin Oscar award ceremony-ah hian khawvel bengverh zawng tak thil thleng a awm a, chu chu hei hi a ni- Best Actor Award dawngtu Will Smith chuan award pesenter Chris Rock stage-ah a beng!

Film che ṭha zual
Oscar award sem apianga ngaihven hlawh ber ṭhin chu Best Picture award a ni a, he award hi kuminah hian 'CODA' chuan a dawng. 'CODA' hian award pathum lai a dawng a, Best Adapted Screenplay bakah a changtu zinga mi Troy Kotsur chuan Best Supporting Actor award a dawng bawk.

'Dune' chu award dawng tam ber a ni a, Best Original Score, Best Cinematography, Best Production Design, Best Sound, Best Film Editing leh Best Visual Effects Award-te a dawng a ni.

'The Eyes of Tammy Faye' chuan award pahnih dawng ve bawkin che ṭha ber pawl a ni ve bawk.

Will Smith leh Chris Rock-te khan lem an chang em ni?
Kumin Oscar award semnaa ngaihven hlawh ber chu Will Smith leh Chris Rock-te kha an ni awm e.

Fiamthu thiam Chris Rock chuan stage a rawn chuangkai a, Best Documentary Feature award hlantu tur a ni. Chutah chuan Will Smith nupui Jada Pinkett Smith lukawlh chu fiamthu thawhna atan hmangin 'G.I. Jane' chhunzawmna a nghahhlelh thu a sawi. Mipui pawh an nui ham ham a, Will Smith ngei pawh camera-in focus-in a nui hmel hmuh tur a awm. Mahse Jada erawh a nuih a za tehchiam lo tih a hriat.

Chris Rock chuan thildang sawi chhunzawm leh mai a tum laiin stage-ah Will Smith chu rawn lawnin a rawn beng ta ṭhuai mai le! A tirah chuan mipui pungkhawm pawhin fiamthu an thawh emaw an la ti a, mahse Will Smith chuan a ṭhutnaa a let leh hnuah thinrim takin a nupui hming lam tawh lo turin vawi hnih ngawt pawr takin Chris chu a hrilh. Chris a nui tawh loa, mipui pawh an ngawi ṭhuap!

Hei hian sawizui a hlawh. Social media-ah sawi zui a hlawh nghal a, mi ṭhenkhat chuan an 'staged' (lemchan) niin an ngai a, ṭhenkhat erawh chuan Will Smith hmelah khan tider hmel a lang lo an ti ve thung.
Will Smith a tira a nuih avang khan a lem niin an ngai a, Chris a ben hnua camera-in a focus hma khan a nui deuh nite pawhin an sawi. Mahse a hnuah Academy lakah ngaihdam te hial a dil leh bawk si vangin chan chawp nia ngai lotu pawh an tam.

Oscar hi mipuiin an hlut tawh lo a, chuvang chuan miin an ngaihven theihna turin Will Smith leh Rock-te khan lem an chang, ti pawl pawh an awm ve bawk.

Will Smith thukhawchang
Best Award a dawn hnua thu a sawinaah Will Smith chuan hnuk ulh ṭeuh chungin a chet dan vangin ngaihdam a dil. Academy lakah ngaihdam a dil a, Chris Rock lakah erawh a dil lo.

"Kan hna angah hi chuan mi án hlate pawh dawhthei taka dawnsawn a ngai a, miin kan chungchang mak taka an sawi pawhin kan ngaithla liam thei tur a ni. He hnaah hi chuan miin min zah lo a nih pawhin kan tuar thei tur a ni a, nui chungin, pawi ti lo anga awm tur a ni tih ka hria.

"Academy chungah ngaihdam ka dil duh a, ka nominee pui zawng zawng chungah ngaihdam dil ka duh bawk. Art hian nunah lantir a nei: pa mak tak ka ang. Richard Williams chungchang an sawi ang chiahin. Mahse hmangaihna chuan thil mak tak min tihtir thei a ni," tiin a sawi.

Award langsar dawngte chu...
Boruak siam hattu Will Smith chuan King Richard lem thiam taka a chan avangin Best Actor a dawng a, 'The Eyes of Tammy Faye'-a changtunu Jessica Chastain chuan Best Actress Award a dawng ve thung.

'The Power Of The Dog' director Jessica Chastain chu Best Director a ni a, 'No Time To Die' OST 'No Time To Die' Best Original Song-ah thlan a ni bawk.

Chutichuan...
Academy of Motion Picture Arts and Sciences (AMPAS)-in kum tina an sem ṭhin Oscar Awards 2022-ah hian Regina Hall, Amy Schumer leh Wanda Sykes-te chu host an ni a, kum 2011 hnua host pakhat aia tam an awm lehna hmasa ber a ni.

Award nominee zingah khan 'Dune' chu Box Office aṭanga sum lalut tam ber niin $maktaduai 400.6 lai a lalut thei a, a dawttu chu 'West Side Story' niin $mtd 72.2 a lalut thung. An sum lakluh a inthlau hle.

Oscar Awards 2022 winner list:-
Best Picture : CODA
Best Director : Jane Campion (The Power Of The Dog)
Best Actress : Jessica Chastain (The Eyes Of Tammy Faye)
Best Actor : Will Smith (King Richard)
Best Supporting Actress : Ariana DeBose (West Side Story)
Best Supporting Actor : Troy Kotsur (CODA)
Best Original Screenplay : Bellfast
Best Adapted Screenplay : CODA
Best International Feature Film : Drive My Car (Japan)
Best Animated Feature Film : Encanto
Best Documentary Feature : Summer Of Soul
Best Documentary Short : The Queen of Basketball
Best Animated Short : The Windshield Wiper
Best Live Action Short : The Long Goodbye
Best Original Score : Dune
Best Original Song : No Time To Die (No Time To Die)
Best Cinematography : Dune
Best Costume Design : Cruella
Best Production Design : Dune
Best Makeup and Hair : The Eyes of Tammy Faye
Best Sound : Dune
Best Film Editing : Dune
Best Visual Effects : Dune