Will Smith-a'n Chris Rock ngaihdam a dil

Oscars film academy-in Will Smith dem!
Academy of Motion Picture Arts and Sciences (AMPAS) chuan thuchhuah siamin Oscars award sem zana Will Smith chet dan chu an dem tih an sawi. Hetihlai hian Will Smith chuan Chris Rock lakah ngaihdam a dil ve bawk.

Thuchhuah an siamah Academy chuan,"Academy chuan nizan show-a Mr. Smith chet dan kha a dem. Thil thlen dan kha mumal takin kan ennawn a, Bylaws, Standards of Conduct leh California law behchhanin a ṭul angin hma kan la ang," an ti.

Academy lamin thuchhuah an siam hnuah hian Will Smith chuan thuchhuah siam ve bawkin,"Vantlang hmaah Chris, ngaihdam ka dil duh che. Ka huang chin ka pel a, ka tisual a ni," tiin a sawi.

Smith hian Instagram lamah,"Tharum thawhna chu eng ang pawh nise tur hlauhawm tak leh chhiatna thlentu a ni," tiin a tarlang a, "Nizana Academy Awards-a ka chen dan kha pawm theih leh ngaihzam theih a ni lo. Infiamna hi ka hna peng pakhat a ni a, mahse Jada damlohna chungchanga fiamthu kha ka tan chuan a sang lutuka, ka thinlunga thawk angin ka che chhuak ta mai a ni.

"Vantlang hmaah Chris, ngaihdam ka dil duh che. Ka huang chin ka pel a, ka tisual a ni. Ka zak a, ka chet dan kha ka mihring nih duh ang lantirna a ni lo. Hmangaihna leh ṭhatna khawvelah tharum thawhnain hmun a chang lo," tiin thuchhuah a siam.

Will Smith-in kut a thlak vang khan Chris Rock chuan thubuai erawh a thehlut loa, backstage lamah fiamthu thawhna atana hmang zuiin,"Muhammad Ali-a'n a hnek che a hliam engmah a awm lohna awmchhun a ni," tiin a sawi zui niin report ṭhenkhatah chuan an tarlang. Rock hian Will Smith-a'n Ali biopic-a channa chungchang a sawi a ni.

Academy Board of Governors-te chu vawiin lamah hian Smith chet dan chungchangah an ṭhukhawm dawn nia sawi a ni a, mi ṭhenkhat chuan Will Smith Oscar award dawn an chhuhsak leh an ring hial.