Hornbill Festival-a zai tur Sangtei Renza & Adama

TV-a fakna leh Mizo film velah te kan hmuh tam avangin mi tam zawk chuan an zaithiam zia kan lo la hre lo a ni mai thei. Heti chung hian state pawn aṭang pawhin an zai ngainatu eng emaw zat an lo awm reng a, hmarchhaka festival ngaihven hlawh ber tih ngam Hornbill Festival-ah hial zai tura sawm an ni ta.

Adama leh Sangtei Renza te chuan tun Pathianni hian Mizoram chhuansanin Nagaland an pan dawn a, December 1 - 10 chhunga neih tur Hornbill Festival-ah an zai dawn a ni. Adama leh Sangtei Renza te hian sap hla an cover ṭhin a, Hornbill Festival-ah pawh hian sap hla an sa dawn a, ruahman dan chuan December 3, Thawhṭanni hian an perform ang.

Adama chuan, "YouTube aṭangin kan zai te an lo hria a, heta ṭang hian sawmna pawh hi kan dawng ta a ni. Kan tan chuan sawmna duhawm tak a ni a, tihhlawhtlin ngei pawh kan tum a ni," tiin, sawmna an dawn chungchang a sawi. Adama chuan sawi zawmin, "YouTube kaltlangin mi tam takin kan zai an lo ngaithla tih hriat hi a lawmawm a, Blue Wave Record te chungah kan lawm tak zet a ni," a ti.

Adama leh Sangtei Renza te hian Blue Wave Record-ah hian hla inchhawn pariat lai an record tawh a, hengte hi Blue Wave neitupa Bza chuan YouTube-ah a dahchhuah sak ṭhin a ni. Bza bakah hian Joseph Mapuia (CK Hyundai) chu an manager niin an hamṭhatna turin nasa takin hma lakpui a, tun hnaiah pawh sap hla pahnih an record thar leh tawh bawk a ni. An hla ṭhenkhat phei hi chu mi maktaduai khat chhuangin an view tawh a ni.

Sawmtu an ngah!
Sangtei Renza leh Adama te hian zai tura sawmna an dawng mawlh mawlh mai a, Lucknow aṭangte pawhin sawmna an dawng hial. Hornbill Festival-a an zai hnu hian Arunachal Pradesh-a Mechuka Festival leh Genesis Club, Lucknow-ahte an inlan zui dawn a ni. Mechuka Festival hi Ministry of Tourism, Govt. of India leh Department of Tourism, Govt. of Arunachal Pradesh ṭangkawpten an buatsaih a ni.