'World AIDS Day' denchhenin Free Concert buatsaih
Mizoram State AIDS Control Society (MSACS), AIDS Healthcare Foundation (AHF) India, India Cares leh Zonet Cable Network Limited ṭangkawp chuan nimin khan 'World AIDS Day' denchhenin Millenium Centre Roof Top-ah free concert an buatsaih.
World AIDS Day hi December 1-ah hman ṭhin a ni a, HIV/AIDS chungchang mipui hnena zirtirna hun atan hman ṭhin a ni. Kuminah pawh Free Concert buatsaihin mipui hnenah he natna chungchang inhrilhhriat thar lehna atan leh mahni dinhmun inhriat hma pawimawh zia inzirtirna atan hman a ni.
A hmunah hian HIV test-na (testing booth) chhawp a ni bawk a, hei hi mithiam bik counsellor leh lab technician ten ṭhutchilhin thisen eng emaw zat an test sak. Thisen endikte hi a ṭul angin service centre dangah thawn zel tura ruahman a ni bawk.
He Concert-ah hian zaithiam lar tak tak an inlan a, model leh infiamna lama mi chhuanawm tak tak te an tel bawk. Mizo Idol star Jerry Lalrinawma leh Ticos Darhmingliana ten zaiin mipui an awi a, DJ Lalvenhimi, Zorinzuali Khaingte leh zai thiam dang eng emaw zat an perform bawk.