Tenu-i music video thar a chhuak ta

Saitual nula PC Van­lalhriati (Tenu-i) chuan kumin a music video palina, 'Hmanhmawh la' tih hla leh 'Chawimawina' tih hla medley chu YouTube kaltlangin a tichhuak ta.

Tenu-i hian music video pathum a lo tichhuak tawh a, a palina turin hla tho thang ṭha tak - lampui rem em em mai a rawn tichhuak leh ta a ni. He hla-ah hian lam thiam tak tak lam pawh hmuh tur a awm a, mit leh beng a tlai hle a ni.

'Hmanhmawh la' tih hla hi Mizo mipa zaithiam zinga hriat hlawh ber te zinga mi Ngurthangvela phuah a ni a, a nung ṭha vat vat hle. 'Chawimawina' tih hla hi sap hla aṭanga lehlin a ni thung a, zaithiam Ronald leh Tenu-i te lehlin a ni. Music track leh recor­ding hi Ṭpa, Mood Station Record siam sak niin, video hi Remruata (Bily­waif) kutchuak a ni bawk.

Lam thiam tak tak te hi Ramthar Corps SAY, Bethlehem Corps YPSC leh Laipuitlang Corps YP te an ni a, midang eng emaw zatin an pui bawk. Tenu-i music video hi Rev. Muana Khuptong chhungkua ten an sponsor a ni.

He hla hi ṭhalai leh kum lama naupang zawkte pawhin an hlimpui leh lampui thei tur chi a ni a, Pathian fakna hla ṭha tak a ni. Tenu-i chuan, "Hetiang lam hla hi a tam loh avangin ngaihtuahna pawh ka seng nasa hle a, Pathian hnenah pawh vawi eng emaw zat ka dil a ni. Ka sak mawi leh mawi loh chu engpawh ni se, Pathian ropui ber se tih hi ka duh ber a ni," tiin, a music video thar chungchang a sawi. Hei bakah hian hun rei loteah Krismas hla tihchhuah leh a tum thu a sawi lang bawk.

Tenu-i music video thar hi Music Domain Mizoram (MDM) YouTube channel-ah upload a ni.