Teawmi music video thar 'Hlim zai i vawr ang'

Mizo Idol star Im­manuel Lalawmpuii (Teawmi) official music video hmasa ber 'Hlim zai i vawr ang' tih chu Zonet local channel-ah tihchhuah a ni ta.

Mizo Idol Season 6-a hriat hlawh tak Teawmi hian a hunchep tak karah music video thar a rawn chhawpchhuak a, a zai ngainatute tan chanchin lawmawm tak a ni ngei ang. 'Hlim zai i vawr ang' tih hla hi Lalngaihawma Hnamte (Angaiha) phuah niin, Krismas hla ṭha tak a ni. He hla hian a tum ber chu - khawvel thil leh hlimhlawpna dangte buaipui lo va, rilru thianghlim tak pu chhunga hlim taka Lal chibai buk tura inbuatsaih tura sawmna a ni.

Teawmi music video hmasa ber hi social media lama lar tak, In House Pro­duction chuan an siamsak a, an kuthnu a mam ṭha hle. Music track hi Alive Project Band kutchhuak niin, he hla phuahtu Angaiha chuan Sun Studio Recording-ah hla hi a record sak bawk. Teawmi music video-ah hian Vaivakawn CO Bial Songters te an inlan bawk.