Zoremi Hmar Zote lehkhabu tlangzarh dawn

Lengzem Magazine leh hmun danga a thuziak hlimawm tak tak avanga lawm leh hriat hlawh tak, social media lamah pawh follower ngah em em mai Zoremi Hmar Zote lehkhabu hmasa ber - Chumchi Leng (Zomors) tih chu vawiin chawhnu dar 1:00 hian tlangzarh a ni dawn ta.

Tlangzarh inkhawm hi The Grand Hotel, Chanmari-ah neih tur a ni a, PL Liandinga'n a kaihhruai ang. Lengzem Magazine editor Vanneihtluanga chuan Chumchi Leng (Zomors) hi a release dawn a, Rs. 200/- man tur a ni.

He lehkhabu thar hi phek 287-a chhah niin, thu hlimawm leh zangkhai lam chi hlir, Zoremi specialized-na hlang dah khawm a ni. Hlawm li-ah ṭhen niin, a tawpah thawnthu hlimawm dahkhawm a ni bawk.

Zoremi Hmar Zote hi Mizo hmeichhe zinga humourist kan neih ṭhat ber te zinga mi niin, he lama mi bik anih avang hian "humors" tih leh "Zoremi" tih kaikawpin genre hranpa 'Zomors' tih an chhersak hial a ni.