Priyanka Chopra & Nick Jonas 'Tiam tlat e' an ti ve ta
American singer Nick Jonas leh Indian actress Priyanka Chopra te chuan, Bollywood star Ranveer Singh leh Deepika Padukone te hnungzuiin 'Tiam tlat e' an ti ve leh ta!
Kum 26 mi Nick Jonas leh a aia kum 10 zeta upa Priyanka te hi Inrinni khan Kristian danin an innei a, nimin Pathianni khan Hindu sakhaw danin an inkutsuih leh bawk. An inneih thu hian media khawvel a dengchhuak hneh hle a, lawmpuitu pawh an ngah hle.
Khawi hmunah nge?
An lo sawi lawk tawh angin Nick Jonas leh Priyanka te hian Umaid Bhawan Palace, Jodhpur, Rajasthan-ah inneih hi an buatsaih a, an chhungkhat laina leh ṭhenrual ṭha ten an ṭawiawm a ni. Nick Jonas hi American a ni a, Priyanka erawh India chhulchhuak a ni.
Hei vang hian an inneih pawh a hautak hret a, a ni khat ni hian Kristian danin an inkutsuih a, nimin khan Hindu danin an ti ve leh bawk a ni.
Tunlai milar dangte innei ang bawkin inneih lawmna hian ni li chhung zet a awh dawn a, vawiin hian a lawmna hnuhnung an buatsaih ang. Zirtawpni aṭang tawh khan a lawmna hi neih ṭan niin, an ṭhian hnai zualte nen intihhlimna hun an hmang a ni. He hunah hian Shraddha Kapoor, Alia Bhatt, Glen Powell leh Farhan Akhtar te pawh an tel a ni.
Hei bakah hian Delhi leh Mumbai-ahte a hranin a lawmna puitham tak buatsaih an la tum cheu bawk niin an tarlang.
Tute nge inlan?
Jodhpur-a inneih buatsaihah hian an chhungkhat te an tel ṭha hle a, Joe Jonas leh Kevin Jonas pawhin an unau pa an ṭawiawm. Game of Thrones star Sophie Turner hmel hmuh tur a awm bawk a, ani hi Joe Jonas nen 2016 aṭanga inzui an ni. Priyanka pawhin ṭawiawmtu a nei ṭha a, Siddharth leh Parineeti Chopra te hmel pawh hmuh tur a awm a ni.
Lawmpuitu an ngah
Nick Jonas leh Priyanka te hian lawmpuitu an ngah hle a, duhsakna tinreng an dawng a ni ber. Bollywood leh Hollywood star tam takin an lawmpui thu an sawi a, super model Gisele Bundchen pawhin nupa tuak thar te duhsakna a hlan ve bawk. American actor Michael B Jordan leh Indian actress Alia Bhatt te pawh an bang bik lo.
Thuam lam hi...
Priyanka leh Jonas te hian an tana ni ropui bikah hian American fashion designer ropui Ralph Lauren kutchhuak an inbel a, an mawi kher mai. An thuam inbel hi a Indian deuh raih a, Ralph Lauren kutchhuak ni awm reng mawi a ni.
Fashion company lar Ralph Lauren-a chief creative officer ni bawk Ralph chuan, "Nick leh Chopra te thinlung takin ka lawmpui a, kan kutchhuak an inbel hian min tilawm hle a ni," tiin Twitter-ah a tarlang. Priyanka hian Ralph Lauren gown a ha a, Nick pawhin Purple Label tuxedo an tih chu a inbel a ni.
Thil hlui!..
Nick Jonas leh Priyanka Chopra te hi kum 2017 khan a vawi khat nan Met Gala-ah an inlan dun a, mipui an barakhaih hle. Hemi ṭum hian Ralph Lauren kutchhuak an inbel a, New York khawpuiah hian mipui mitfukna ber te zinga mi an ni.
Hemi hnu hian mipui hmuhah an inlan zui vak lo a, kumin kumtir lam khan thawn an rawn nei ṭan leh chauh. Heta ṭang hi chuan media te ngaihven ber an ni chho a, July thla khan an inhual thu an puang zui bawk. Inhualna pawh hi an bei urhsun viau a, an chhungkhat laina hnaiten an telpui a ni. An inhual aṭanga thla tam pawh a liam hmain an inkutsuih ta a ni.