Fa neih vanga buai lo Candice Swanepoel

South African model Candice Swanepoel chuan fa a neih avanga a buai loh thu leh, Victoria Secret Fashion Show atana inbuatsaihna hun ṭha tak a nih zawk thu a sawi.

Kum 30 mi Candice hian fa pahnih a nei tawh a, a naupang zawk Ariel Swanepoel Nicoli chu thla nga mi lek a la ni. Hetiang a nih mek lai hian Candice erawh a lungngai lo a, a tana ṭha tur zawkah a ngai. Victoria Secret model chuan, "Nau ka pawm avangin a hma-a ka lo tih ṭhin te ka thlah phah loa, Victoria Secret Fashion Show atana inbuatsaih nan ka hmang zawk a ni. Ṭha taka lo kir leh ka tum a, chumi tur chuan nasa takin ka bei mek a ni," tiin, a beih nasat thu a sawi.

Candice chuan a pasal fanaute chu a nuna mi pawimawh ber an nih thu sawiin, chhungkua a dah pawimawh ber tih a sawi. Candice Swanepoel chuan fa tam tak neih a, chhungkaw hung tan din chu a lo suangtuah ṭhin a nih thu a sawi lang bawk.