Bruce Willis-in lemchan khawvel a mangṭha dawn ta!

Lemchan thiam Bruce Willis chuan 'aphasia' natna vangin lemchan a chawlhsan dawn.

'Die Hard' actor Bruce Willis-a'n lemchan chawlhsan tur chungchang hi a nupui Emma Heming-Willis leh a nupui hlui Demi Moore-te chuan Instagram kaltlangin an puangzar a, a natna vei 'aphasia' chuan a hriatna lamah nghawng a neih avangin a nuna pawimawh tak lemchan khawvel a kalsan a ngai dawn ta a ni, an ti.

Aphasia natna hi hriatna lam nghawng thei thluak natna, a bikin ṭawng leh thil ziah kawnga harsatna siam thei a ni a, kum 67 lai ni ve tawh John McClane role hnehsawh taka lo chang ṭhintu Willis pawh he natna hian a tibuai mek a ni.

Willis lemchan chawlhsan tur chungchang hi a chhungte chuan thuchhuah inṭawm siamin an puangzar. Moore nen khan fanu pathum an nei hman a, a nupui pahnihna Heming-Willis nen hian fanu pahnih an nei ve tawh bawk.

Lemchan khawvel miropui Bruce Willis
Bruce Willis hian lemchan khawvelah sulhnu a hnutchhiah ṭhain hre lo fa pawh an tlem hlein a rinawm.

1980s tir lamah khan lemchan khawvel a luhchilh ṭan a, a hun tir lamah chuan hriat a hlawh em em bik lo. Mahse ABC TV series 'Moonlighting'-a a inlan aṭangin hriat a hlawh ṭan a, kum 1988-a tlangzarh 'Die Hard' film-a John McClane lemah a chang leh a, hemi hnu aṭang hi chuan lemchan khawvela a hming a dai leh tawh ngai lo ang. Chumi hnuah chuan film lar tak tak- 'The Sixth Sense', 'Armageddon' leh 'Pulp Fiction'-ahte chang lehin Variety lamin an chhut dan phei chuan a film channa zawng zawngin sum a hmuh chhuah chu $tluklehdingawn 5 chuang daih a ni.

CBS series lar tak 'Friends'-ah pawh a inlan a, film 100 chuang chang tawhin tunah pawh hian a inlanna film tlangzarh loh eng emaw zat a la awm.

Aphasia chu eng nge?
Thluak natna chi khat niin mihring hriatna, a bikin ṭawng lamah harsatna a siam ṭhin. Thluak vei lam ṭhat loh vanga thleng a ni tlangpui a, thil chhiar, ngaihthlak, ṭawng, typing leh thil ziah an harsat ṭhin. Ṭawng harsat chu natna lanchhuah dan tlanglawn ber a ni.