Hontrade International Ṭhazual Fakna ; A hmun ngaiah Hlimhlimi

Hontrade International Ṭhazual chart-a vawi eng awm zat pakhatna lo hauh tawhtu Hlimhlimi chuan a hmun ngai, No.1 bawk a hauh leh ta. Tun ṭumah erawh a hla a dang ta thung a, 'Min pui ang che' tih a ni.

He hla hi September thla khan a tichhuak a, chart-ah pawh kan hmu nghal chat a nih kha. Zawi zawia hma sawnin dinhmun sang berah a rawn inhlangkai a, mipuiin a zai an la ngaithla kham lo tih a lang.

‘Minpui ang che’ tih hla phuahtu hi R. Lalchhanhima (Chhantea) niin, ani hian hla ṭha tak tak eng emaw zat a phuah tawh a ni. A hla hi kawng dik hriaa sual kawng zawh ṭhin ten, Pathian hnena tanpui an dilna testimony hla ṭha tak a ni. Video hi Mawitea Hauchhum (RDS) kutchhuak niin, music hi Lal K. Sailo siam sak a ni thung.

Tun ṭum chart-ah hian Jennie Lalruatfeli chuan 'Thuneihna I ta' tih hla hmangin pahnihna a hauh a, Grace Lalchhanhimi chu pathumna a ni. Grace-i hian 'Rinna mitin ka thlir thin' tih hla hmang hian chart hmasa lamah khan pakhatna a lo hauh tawh a ni.

Henry Varte chu palina-ah awmin, Stacy V.L. Muanpuii chuan a dawt a, R. Lalrinmawii (Arini) chu parukna-ah a awm.

Ṭhazual chart-a mikhual lo tak Amtea leh Sawmtea te chu top 10-ah an lang a, Mizo Idol star Teawmi chu a vawi khat nan a inlar bawk. 'Chibai I buk ang' tih hla mawi tak satu Seraphic Choir te chuan hnu an khar thung a ni.