TBC Zaithanpuia Krismas hla pahnih tichhuak

Kuminah ringawt pawh music video ṭha tak tak a tichhuak nual tawh a, heti chung hian a la duh tawk lo cheu. TBC Zaithanpuia chuan Krismas urlawk nan hla pahnih a tichuak leh ta a, nizan khan a YouTube channel-ah upload a ni.

TBC-a music video thar hi 'Ngaiteh kum hlui' tih leh, 'Mal min sawm turin' tih hla te a ni. 'Ngaiteh kum hlui' tih hla hi Hrawva (L) phuah niin, TBC-a hian thiam takin a rawn sa thar ve leh a ni. Music track hi rimawi khawvela hnuhma nei ṭha tak Ephraim Malsawma siam sak niin, Gosen Recording Studio-ah recording tih a ni. Video hmuhnawm tak mai hi Andrew Laltlankima kutchhuak a ni thung.

'Mal min sawm turin' tih hla hi Kristian Hlabu a mi a ni thung a, kan hla hriat larsa kha mawi leh ngaihno bei takin a rawn sa chhuak a ni. A music mawi tak mai hi Larry siamsak niin, Gosen Recording Studio chuan recording an tihsak leh bawk. 'Van hmun ropui' tih music video mawi tak maia siam sak tawhtu BKL Video Production chuan video hi a siamsak leh a, a kutchuak hmuh a nuam leh pek hle.

TBC Zaithanpuia hian kuminah music video panga a tichhuahna a ni tawh a, mipuiin a zai ngaih­thlak an la kham lo tih a hla tichhuah tawh te aṭangin a hriat hle. A hla te hi YouTube-ah en en theih turin a chawp­chhuak ṭhin a, entu pawh an ṭhahnem thei hle.

Tun hi Krismas hla a tichhuah ṭum khatna a ni tawh lo bawk a, hemi hma hian pathum vel chu a lo tichhuak tawh a ni. Chung zingah chuan ama hla phuah, Feli Thangluah, Henry Varte, Temi Sailo leh Freddy te nena an sak 'Naupiang I lawm ang u' tih pawh kha a tel a ni.