Zanin aṭangin ZoFest ṭan dawn

Mizo Zirlai Pawl (MZP) General Headquarters buatsaih Zofest 2018 chu zanin ṭang hian Reiek khuaah neih ṭan a ni dawn ta. Zanin hian pandal 'Zo Inpui'-ah palai lawmna inkhawm buatsaih a ni ang a, Ebenezar Khawtinsiami (Myanmar MP), Remliana Pangkhua (Rangamati Hills District Councellor) leh Dr. C. Vanlalramsanga (IES Secretary) te chu khual lian an ni ang.

Zofest hi December 4-7 chhunga neih tura ruahman niin, naktukah vantlang inkhawm a awm ang. Zirtawpni hian a hmawr bawk a ni ang a, nitin program benglut tak tak a awm dawn a ni. Zofest neih chhung hian hmun hrang hrang aṭangin Zohnahtlak an fuankhawm dawn a, state pawn aṭang pawhin mi eng emaw zat lo tel tura beisei an ni.

Zaithiam hrang hrang an zai dawn a, chung zingah chuan Lalpanliani (Pantei) pawh a tel dawn a ni. Ani bakah hian local artist Lancy Remlalhruaii, K. Lalthlamuankimi (Mami), Rebecca Zorintluangi, Lalruatfeli (Triau Trackx), Zualbawihi, H. Vanlalhlana, Thangromawia Thomte, Ticos Darhmingliana leh Kimkima te pawh an zai dawn a ni.