Box Office ; Ralph khum thei an awm lo

Tun hnaia film chhuak thar zingah Ralph Breaks the Internet aia sum lalut hnem an awm lo a, a zawnin kar hnih chhung No.1 a hauh tawh.

He fantasy/adventure film hian kar liamta chhung khan $mtd 25.7 a lalut a, North American box office-ah roreltu a ni zui zel. American stand-up comedian Sarah Silverman leh John C. Reilly te channa Ralph Breaks the Internet hi November 21 khan tlangzarh a ni a, mipuiin an hlut hle.

Tlangzarh kar hian $mtd 80 chuang zet a lalut a, Box Office-ah sum hailut hnem ber a ni. He film hi khawvel hmun hrang hrangah chhuah chhoh mek zel niin, kar liam ta chhung ringawt pawh khan a sum lakluh hi a pung nasa hle a ni. North America bik aṭanga a sum lakluh tawh hi $mtd 119 a tling tawh a, khawvel hmun danga a lakluh te nen chuan $mtd 206 zet a tling tawh a ni.

Hetihlai hian November thla tir lama release Dr. Seuss' The Grinch chu sum lalut tam pahnihna-ah a la awm vang a, entu an tlahniam tak tak thei lo. Chutih rual chuan a sum lakluh erawh a tlem ve hret hret a, kar liam ta chhung khan $mtd 17 a thawk chhuak leh a ni. Creed II chuan $mtd 16 lalutin, sum lalut tam pathumna a ni. Hollywood star - Sylvester Stallone, Michael B. Jordan leh Dolph Lundgren te channa film hi tun lai film chhuak thar zingah chuan ngaihven hlawh ber te zinga mi niin, November 21 khan US-ah tlangzarh a ni. Boxing ngainatute tan chuan en hmaih chi a ni lo a, mipui pawhin an hlut hle a ni.

Fantastic Beasts: The Crimes of Grindelwald leh Bohemian Rhapsody te chu top 5-ah langin, an sum lakluh zat chu $mtd 11 leh $mtd 8 te a ni. Instant Family chu sum lalut tam parukna niin, a hnuiah hian The Possession of Hannah Grace chu a awm bawk.

Thriller/action film chhuak thar Robin Hood chuan beisei a pha lo thung a, kar liamta chhunga a sum lakluh zat chu $mtd 4.7 a ni. Welsh actor Taron Egerton, Northern Ireland star Jamie Dornan leh American actor Jamie Foxx te channa Robin hood hian pariatna a hauh pha ṭawk a ni. Top 10-ah hian Widows leh Green Book te chu an lang ve bawk.