Red Hot Chili Peppers 'Unlimited Love' a ngaihthlak theih ta

Red Hot Chili Peppers chuan nimin, April Fool ni tak khan an studio album 12-na 'Unlimited Love' an tlangzarh a, streaming platform hrang hrangah ngaihthlak theihin a awm tawh.

'Unlimited Love' hi an guitarist duhlai John Frusciante rawn kir leh hnua an album tihchhuah hmasa ber a ni a, Frusciante hian kum 2009 khan an band chhuahsanin kum 2019 khan a zawm leh a ni. Warner Records kaltlanga an tlangzarh niin June thla hian an album tilarin tour an nei ang.

RHCP album tharah hian hla 17 lai a awm a, an album-a hla zawng zawngte hi an pali- Anthony Kiedis, Flea, John Frusciante leh Chad Smith-te phuah vek a ni a, album an tlangzarh hmain single pahnih- 'Black Summer' leh 'These Are the Ways'-te chu an tlangzarh tawh bawk. 'Black Summer' phei chu Billboard chart lamah an chet ṭhatpui a, Billboard Alternative Songs chart no.1 hial niin he chart-ah hian hla 14 no.1 an nihpuina a ni hial.

Album an tlangzarh hma ni chiah, March 31 khan RHCP hi Los Angeles-ah Hollywood Walk of Fame Star Ceremony-ah an tel a, he hunah hian Hollywood Walk of Fame Star-ah puan an ni nghe nghe. An ṭhian hnai ṭhenkhat- Bob Forrest, George Clinton leh Woody Harrelson-te pawhin he hun hi hmanpuiin thute pawh an sawi a ni.

Kum 2016-a 'The Getaway' an tlangzarh hnua an album tihchhuah leh hmasak ber chu 'Unlimited Love' hi a ni a, RHCP music ngainatute tan chuan ngaihven chi viau ang. Music review-tu lam pawhin he album hi an fak angreng hle a, sawichhiatna lam aiin fakna thu hla chhiar tur a tam mah zawk. Rolling Stone lam aṭanga review-tu Britanny Spanos phei chuan rangking 4/5 a pe hial a, " He record hian mahni ina haw leh ang mai a ni. Heng musician pali hmang hian thilmak eng emaw tak a thleng a ni. Frusciante awm loh kha chuan eng emaw tak kha a kim lo ṭhin reng a ni," tiin a sawi.

'Unlimited Love'-a hla awmte:-
1. "Black Summer"
2. "Here Ever After"
3. "Aquatic Mouth Dance"
4. "Not the One"
5. "Poster Child"
6. "The Great Apes"
7. "It's Only Natural"
8. "She's a Lover"
9. "These Are the Ways"
10. "Whatchu Thinkin'"
11. "Bastards of Light"
12. "White Braids & Pillow Chair"
13. "One Way Traffic"
14. "Veronica"
15. "Let 'Em Cry"
16. "The Heavy Wing"
17. "Tangelo"