BBC-ah The Rolling Stones film series

BBC chuan The Rolling Stones band kum 60 tlin lawmna pualin tun nipui chhung hian film series part pali awm an tichhuak dawn.

He series hi BBC Two leh BBC iPlayer-ahte pek chhuah tur niin 'My Life as a Rolling Stone' tih a ni dawn a, rock band lar leh sulhnu ngah Rolling Stones member pali- Sir Mick Jagger, Keith Richards, Ronnie Wood, leh fam ta Charlie Watts-te chuan anmahni pual episode an nei ṭheuh dawn a, episode pakhat hi darkar khat vel zel a ni dawn bawk.

Band member-te footage la tihchhuah ngai loh hmuh tur a awm nual dawn bawk a ni. English rock legend The Rolling Stones-te hian an kum 60 tlin lawmna pual hian European Summer Tour an nei dawn bawk a, ram 10-ah show 14 an nei dawn a ni.