FIFA World Cup™ Official Soundtrack 'Hayya Hayya (Better Together)' a chhuak ta

FIFA World Cup Qatar 2022™ Official Soundtrack 'Hayya Hayya (Better Together)', Trinidad Cardona, Davido leh Aisha-te sak chu Zirtawpni zana tournament final draw an neih hma lawk khan tlangzarh a ni a, streaming platform hrang hrangah a stream theih tawh.

Kumin FIFA World Cup pual hian hla eng emaw zat an tichhuak dawn a, 'Hayya Hayya (Better Together)' hi an tihchhuah hmasak ber a ni. FIFA chuan thuchhuah an siamah,"Kum 2021 kum tir lama FIFA sound strategy kan puan tawh angin leh khawvel ram hrang hranga mite football leh music lama thlunzawmna turin FIFA chuan hma a la ni. Single tihchhuah hi platform hrang hrangah a awm tawh bakah FIFA YouTube channel lamah a official video a awm tawh a ni," tiin an tarlang.

"US star Trinidad Cardona, Afrobeats icon Davido leh Qatari sensation Aisha-te thawhhona hian FIFA World Cup™ boruak leh FIFA Sound Strategy ram hrang hrang aṭanga phurna pein a chawk nung hle a ni," tiin an tarlang bawk.

"America, Africa leh Middle East zaithiamte hruaikhawm hmang hian he hla hian music- leh football- in khawvelah pumkhatna an thlen thei a ni tih a lantir," tiin FIFA Chief Commercial Officer Kay Madati chuan a sawi a ni.

FIFA World Cup Qatar 2022™ pual hian hla dang pawh an la tichhuak dawn a nih hmel a, ram hrang hrang artist-te'n World Cup pual hian hla dang pawh an la rawn tichhuak dawn a nih hmel.

FIFA hian TikTok lamah pawh channel an siam tawh a, football fans, music enthusiast, player, artist-te thlunzawmna turin entertainment strategy hrang hrang an kalpui mek a ni.

'Hayya Hayya (Better Together)' singer zinga mi Trinidad Cordona chuan, "Hla (Better Together) ka ngaihthlak hmasak ber khan, thawk lehkhatah ka mood a ṭha nghal, lawmna hla a ni a, FIFA World Cup din chhan zawng zawng a lantir. Khawvel ram hrang hranga mite an rawn kalkhawm, he thuchah hi ka ngaina tak zet," tiin an hla thar chungchang chu a sawi.