Academy aṭangin Will Smith a báng!

Oscars award sem zana Chris Rock a ben boruak kal zelah Will Smith chu Academy of Motion Picture Arts and Sciences member a nihna aṭangin a bang niin The Hollywood Reporter chuan an tarlang!

The Hollywood Reporter chuan thuchhuah an dawn puangzarin Will Smith chuan hrehawm a ti a, a chunga hremna an lekkawh zawng zawng chu a pawm vek niin a sawi, an ti.

"94th Academy Awards semnaa ka chet dan kha a mak a, a na a, ngaihdam theih a ni lo. Ka tihnat an tam hle a, chung zingah chuan Chris, a chhungte, ka ṭhian ṭha tak tak leh ka mi ngainat te, lo kalkhawm zawng zawng leh in aṭanga entu zawng zawngte an tel.

"Academy min rinna ka phatsan a ni. Nominee dangte leh award dawngtute'n lawmna leh an hnathawh ropui tak an lawmna hun tur boruak ka tichhe bawk," tiin a sawi niin THR chuan an tarlang.

Will Smith hi Academy aṭang hian bang ringawt mah se nominee a la ni thei tho a, Academy Awards semna dangah pawh a la tel thei tho a, award-te pawh a la dawng thei dawn tho thung. Mahse Oscars-ah vote a thlak thei tawh dawn lo thung a ni.

Academy lam pawhin thuchhuah an siamah," Academy of Motion Picture Arts and Sciences aṭanga Will Smith banna kan dawng a, kan pawm bawk. Smith chet dana hma kan lakna tur zawng zawng pawh kan chhunzawm zel dawn a, April 18 hian kan inhmukhawm leh dawn a ni," tiin an sawi.