Silk Sonic, Olivia Rodrigo leh Jon Batiste-te tana zan hlimawm

Grammy Awards vawi 64-na chu Pathianni zanah khan MGM Grand, Las Vegas-ah sem a ni ta a, Olivia Rodrigo, Silk Sonic leh jazz musician Jon Batiste-te chu chawimawina dawngtu langsar an ni.

Award dawng tam ber Jon Batiste, Silk Sonic 'Leave The Door Open' a langsar
Nomination hmu tam ber Jon Batiste chu award dawng tam ber a ni. Nomination 11 lai hmuin award panga a pawm haw a, a ni aia award dawng tam an awm lo. A award dawn zingah Album of the Year a tel. A award dawn dang erawh chuan chuti lutukin ngaihven a hlawh zui lem lo.

Bruno Mars leh Anderson. Paak te hla 'Leave The Door Open' chu Grammy awards sem zana hla langsar ber a tih ngam. He hla hian Record of the Year leh Song of the Year a dawng ve ve. Best R&B Performance award leh Best R&B Song an dawng bawk. Award dawng tam ber dawttu an ni.

Olivia-i'n vawi khat a chhimnaah award pathum a pawm haw
American tleirawl Olivia Rodrigo tan chuan kumin Grammy Award hi a chhinchhiah tlak hle ang. Grammy award semna a hmuna a chhim vawi khatna chiah a ni a, chuti chung chuan award pathum a hum haw. Chung zingah chuan award ngaihhlut hlawh leh ngaihven hlawh Best New Artist Award a tel.

A rawn lar chhuahna hla 'Drivers License' chu Best pop solo performance Award a lakpui a, tin, a album 'Sour' chu Best Pop Vocal Album-ah thlan a ni bawk.

BTS perform dawna a bula V a va ṭhut khan eng nge an sawi i rin?

■ Category 86 lai a awm a, Jon Batiste chuan award dawng tam berin panga a dawng. Silk Sonic chuan dawtin Pali an dawng ve bawk. Award pathum dawng eng emaw zat an awm ■

Barakhaih!
Jon Batiste album 'We Are'-in Album of the Year award a dawng hi a mak angreng a, mi hrang hrang a barakhaih ang tih pawh a chiang. He category-ah hian artist lar tak tak- Lady Gaga, Justin Bieber, Olivia Rodrigo, Doja Cat, Billie Eilish, H.E.R, Lil Nas X, Taylor Swift leh Kanye West-te nen an awm ho. Mahse, artist lar lo ber nia hriat Jon Batiste album 'We Are' chu album ṭha bera thlan a ni.

Nomination hmu tam, kut ruaka haw
Pop superstar Justin Bieber chuan award pakhat pawh a hum haw lo. Nomination pariat lai hmu, nomination hmu tam ber dawttu ni bawk Justin Bieber a hnawng. Rimawi khawvelah Justin Bieber hi kum 13 vel a lar ber pawl a ni tawh a, Grammy-ah nomination 22 lai a hmu tawh a, pahnih chiah a la dawng a ni. Hei aia tam hi dawn a phu ve tawhin i hria em?

Billie Eilish pawh kumin chu kut ruakin a haw. Nomination pasarih lai hmuin album, record leh song of the year-ahte pawh nominee a ni a, mahse engmah a hawn lo. Grammy award pasarih lai a dawng tawh tih erawh hre tel ila.

Concert ni bawk, award sem zan ni bawk
Host Trevor Noah chuan,"Award show angin ngai suh u. Concert kara award sem chhuah hun angah ngai rawh u," tiin a sawi. A sawi sual lo.

Silk Sonic chuan ropui takin show an hawng a, Olivia Rodrigo, J Bavin, BTS, Billie Eilish, Brandi Carlile, Justin Bieber, H.E.R, Carrie Underwood, Lady Gaga leh artist lar tak tak inlanna hun hi rimawi tana zan ropui a ni lo, tih chi a ni lo.

Grammy Awards dawngtu ṭhenkhat:-
Record of the Year - Silk Sonic – Leave the Door Open
Album of the Year - We Are – Jon Batiste
Song of the Year - Silk Sonic – Leave the Door Open
Best New Artist - Olivia Rodrigo
Best Pop Solo Performance - Olivia Rodrigo – Drivers License
Best Pop Vocal Album - Olivia Rodrigo – Sour
Best Dance/Electronic Recording - Rüfüs du Sol – Alive
Best Metal Performance - Dream Theater – The Alien
Best Rock Song - Foo Fighters – Waiting on a War
Best Rock Album - Foo Fighters – Medicine at Midnight
Best R&B Performance - Silk Sonic – Leave the Door Open
Best R&B Song - Silk Sonic – Leave the Door Open
Best Rap Song - Kanye West, Jay-Z – Jail
Best Country Solo Performance - Chris Stapleton – You Should Probably Leave
Best Contemporary Christian Music Song - Believe for It – CeCe Winans
Best Contemporary Christian Music Album - Old Church Basement –
Elevation Worship and Maverick City Music