Voltas Malsawm House Ṭhazual Gospel ; Bethsy Lalrinsangi 'Nang chawimawi nan' pakhatna

Voltas Malsawm House Ṭhazual Gospel chart-ah Bethsy Lalrinsangi 'Nang chawimawi nan' pakhatna a ni a, Lalthansangi 'A chatuan ro luah tumin' chu pahnihna niin Nghaktea Fanai 'I ropui an hril' chu pathumna a ni.

Chuai thei lo Bethsy Lalrinsangi
Thla hnih vel liam ta khan Bethsy Lalrinsangi hian a hla 'Nang chawimawi nan' hi a tichhuak a, YouTube lamah pawh nuai chuang thlirtu a nei leh der tawh.

Bethsy hla hi Zohmaa, Jauai leh Sanga Renthlei-te phuah a ni a, Bethsy sak awm tak niin a sa thiam bawka, pakhatna a ni pawh hi a mak lo. Mizo rimawi khawvelah Bethsy kan hmelhriatna a rei tawh a, chuti chung chuan vawiin thlenga Gospel singer huhang ngah ber pawl a la ni thei hian Bethsy Zofate'n kan ngaihhlut zia a tilang chiang viau mai.

Pahnihna leh pathumna chu
Lalthansangi kan hria, a hla thar 'A chatuan ro luah tumin' chu chart-ah pahnihna a rawn ni ta. He hla hi YouTube lamah pawh a hit a, chart topper pawh a la nih thuai a rinawm.

'Min chhungkhat la' tih hla thiam taka satu Nghaktea Fanai chuan a hla thar 'I ropui an hril' chu chart-ah a rawn chet ṭhatpui leh mek a, pathumna a rawn nihpui der tawh.

Chart-a hla lang dang
Maruati 'Ka thlang nawn zel fovang che' chu palina a ni a, Arini 'Luiral mawi' chu pangana a ni thung. Chart top 10-ah hian Seraphic Choir, Priscilla Laldinpuii Fanai, Lalduhawmi Zote, Zorinsanga Sailo leh Cindy Lalthanpuii-te pawh an lang a ni.

Ṭhazual Gospel chart top 10:-
1 Bethsy Lalrinsangi Nang chawimawi nan
2 Lalthansangi A chatuan ro luah tumin
3 Nghaktea Fanai I ropui an hril
4 Maruati Ka thlang nawn zel fo vang che
5 R. Lalrinmawii (Arini) Luiral mawi
6 Seraphic Choir Lalnunnem
7 Priscilla Laldinpuii Fanai Engkim siamtu
8 Lalduhawma Zote Phuar phelhtu
9 Zorinsanga Sailo Lo kir rawh
10 Cindy Lalthanpuii Aw Pathian