Black Widow thar tur Florence Pugh!

Black Widow director Cate Shortland chuan Marvel Cinematic Universe-a Scarlett Johansson Black Widow thlaktu tur chu a sawi thawi a, khawthlang lam media-te chuan hei hi an ngaihven zui hle a, a thlak dawn chiangah an ngai nghal hmiah bawk.

Johansson-i Natasha Roma­noff kha Avengers: Endgame-ah khan a thi tih MCU fan-te chuan an hre vek awm e, chumi a nih avang chuan fanfom lamah pawh Florence Pugh hi Black Widow thar tur a nih ring an awm sa fur a, Shortland thusawi hi a tichiangtuah ngaih a ni.

British magazine Empire-in an kawmnaah Shortland chuan, "Marvel Studios president Kevin Feige chuan fan-te'n origin story an beisei tih a hria a, chumi avang chuan lehlam zawngin kan kal ta a ni. Florence Pugh hi eng tiang taka ṭha nge a nih dawn kan hre bik lo. A ṭha dawn tih chu kan hria a, mahse eng ang tak nge a nih dawn kan ring thiam lo. Scarlett pawh a lawm hle a, 'ka mawhphurhna ka hlan dawn a ni,' a ti hial. Female storyline thar a ni dawn a ni," tiin a sawi.

Kumin November-a tlang­zarh tum Black Widow-ah hian Florence Pugh hi kan hmu dawn tih trailer aṭang leh a film chungchang tarlanna hrang hrang aṭang pawhin a chiang tawh. Romanoff laizawn Yelena Belova lemah a chang a, Avengers: Endgame-ah Romanoff a thih tak avangin Belova hian Black Widow thuam a rawn inbel dawn a nih hmel. Marvel hian hmalam hunah chhunzawmna tur film siam an tum a nih lem loh chuan solo movie an siam tam lo hle. Shortland sawi thawi dan chuan (chiang takin a sawi lo), Black Widow thar kan hmu dawn a ni mai lo a, Black Widow movie dang pawh kan hmu mai thei.

March 2009 khan Scarlett Johansson chuan Natasha Romanoff/Black Widow role play tur hian contract a ziak a, film eng emaw zata he role play tur hian contract an ziak a ni. Kum 2010-a tlangzarh Iron Man 2 aṭang khan inlan ṭanin, Iron Man 2 tihlar hunlai vel 

aṭang tawh khan Marvel Studios President Kevin Feige chuan Black Widow standalone film siam tur hian Johansson hi a lo be daih tawh a ni. Mahse Marvel chuan Avengers lam a hawi tak rih avangin standalone movie lam chu an hawi lawk thei lo a, mahse kuminah erawh kan dam a nih chuan kan hmu hman ngei dawn niin a lang ta.

Scarlett Johansson Black Widow hi Iron Man 2 bakah hian MCU film hrang hrangah a inlan hnem hle a,  Captain America: The Winter Soldier, Avengers: Age of Ultron, Captain America: Civil War, Avengers: Infinity War,leh Avengers: Endgame-ahte pawh khan a inlan a, tunah erawh kan thlah liam dawn ta niin a lang.

Black Widow hian MCU Phase 4 hi a rawn khuh hawng dawn a, The Eternals, Shang-Chi and the Legend of the Ten Rings, Spider-Man: Far From Home chhunzawmna, Thor: Love and Thunder leh Doctor Strange in the Multiverse of Madness-te'n an rawn zui dawn a, MCU fan-te tan chuan a phurawm tawh hle ang.