Tuirial Airfield huamchhungah Ration Kit sem
ZeroTrash, Mumbai leh Green Mizoram Network (GMN) ṭangkawp chuan Tuirial Airfield huamchhunga chhungkaw 50 tan nitin mamawh eitur (Ration Kit) chi hrang hrang an sem.
ZeroTrash hi environmental NGO an ni a, GMN nena thawkdun hian Covid-19 hripui leng vanga Aizawl bawlhhlawh paihna hmun Tuirial Dumping Ground-a hnathawk (waste / ragpickers) leh a bulhnaia awm Tuirial Airfield-a cheng chhungkaw 50 hnenah hian hand sanitizer, buhfai, dal, tel leh alute an hlan a ni. ZeroThrash hian chhungkaw 40 hnenah heng mamawhte hi an pe a, GMN hian chhungkaw 10 hnenah pe ve bawkin Tuirial Airfield VC kaltlangin thilpek hi an hlan a; heng chhungkaw 50-ah hian member 218 an awm.
Thilpek hlanna hi Tuirial Airfield Community Hall-ah neih a ni a, GMN president leh Saitual District DC ni bawk VL Hruaizela Khiangte chuan thilpek hlanna leh thusawina hun a hmang a ni.