Vulmawi Award 2018 ; Entertainer of The Year dawngtu In House Production

Vulmawi Award chu nizan khan Convention Centre, Lunglei-ah sem a ni ta a, tunlai social media lama lar tak In House Production chuan Entertainer of The Year award an dawng.

Kumkhat dana sem ṭhin Vulmawi Award hian ngaihlut a hlawh hle a, award dawngtute pawh an tel ṭha hle. Kuminah hian award 21 zet semchhuah a ni a, zaithiam leh infiammite bakah kawng hrang hrangah mi chhuanawm tak tak ten chawimawina hi an dawng a ni.

In House an vul
Social media lama thawm nei lian tak leh mipui ngaihven In House Production chuan award ngaihlut Entertainer of The Year an dawng a, an phu hle. In House hian programme chi hrang hrang an buatsaih a, chungte chu YouTube leh local channel lamah te tihchhuah ṭhin a ni. An programmee hian ngaihlut a hlawh ṭhin hle a, a bikin ṭhailaite-ah a tlana hle a ni.

In House Production hi kum 2013 khan din niin, a tirah chuan phone camera nen bul an ṭan. 2014 aṭang khan YouTube-ah channel neiin an kut chhuak hrang hrang an phochhuak ṭan a, a tirah chuan music video an siam ṭhin! 2018 a herchhuah meuh chuan ṭhalai te duh zawng phochhuaktu leh, mipui tihlimtu, ṭanpui ngaite ṭanpui ṭhintu hriat hlawh tak an lo ni ta a ni. Tunah hian member pathum - Andrew Lalchhandama, Melody Lalluahpuii Renthlei leh Andrew Vanengmawia te an awm mek a, Andrew-a te pahnih hi bulṭantu an ni.

Rimawi lamah
Vulmawi Award-ah hian Zoram rimawi khawvela mi challang tak tak ten Gospel leh Lengzem/lenglawng huangah te chawimawina an dawng. Gospel bikah chuan Best Female Artist atan Zoramchhani thlan a ni a, mipa lamah C. Vanlalmalsawma (Sawmtea) chuan Best Male Artist award a dawng thung. Best New Artist atan Miriam Lal­nundiki chu thlan a ni a, BCM Choir te chu zaipawl ṭha ber Best Choir atan thlan an ni.

Lengzem/lenglawng huangah chuan Kimkima a langsar a, a hla hit 'Sarah, I zunzam' tih chu Song of The Year atan thlan a ni. Samuel Chhangte chu Best Male Artist atan thlan niin, hmeichhe lamah Zorinzuali Khiangte chu artist ṭha ber atan thlan a ni bawk. Ṭhazual chart-a vawi eng emaw zat No.1 lo hauh tawhtu HT Lalthanzami chu Best New Artist atan thlan niin, Pachhunga University College (PUC) chuan Best Music Video award an la thung.

Best Album chu Chhantea Hlate niin, Best Song Composer award latu chu Lalrindika a ni. Mizo musician zinga hriat hlawh tak Larry Lalrintluanga chu Best Musician atan thlan niin, Hornbill Festival-a pakhatna lo hauh tawh Avora records te chu Best Beat Group atan thlan an ni.

Remsiami a mawi
Hockey khelh a thiam em avanga Mizoram mai ni lo India thlenga tihming ṭha­tu, Lalremsiami chu Sports Per­son of The Year (Female) atan thlan a ni a, mipa lamah boxer NT Lalbiakkima chuan he chawi­mawina hi a dawng ve bawk.

Hetih lai hian TV leh fakna lama kan hmuh zin em em mai Baryl Vanneihsangi chuan phu takin Best Announcer award a dawng a, Best Legislator atan Dr. K Beichhua thlan a ni thung. Dr. C Lalhrekima chuan Writer of The Year award a dawng bawk.

Lifetime Achievement Award chu Dr. Hranghrima hnenah hlan niin, F. Zohmingliani 'National Qualified Refree' chuan Special Award a dawng bawk.