Pensy-i'n hla thar a tichhuak

Mizo Gospel singer zinga huhang ngah ber pawl, Zofate'n a zai kan ngainat em em Pensy B Lalthangliani chuan hun rei tak chhung hla thar a tihchhuah tawh loh hnuah hla thar a tihchhuak.

Pensy hla thar tihchhuah hi 'Vut aiah Parṭhi' tih a ni a, H. Thanga leh H. Lalremruata (L) te phuah niin Blue Wave Records lamah recording chu a ti thung a ni. He hla tichhuak tur hian hun eng emaw chen aṭang khan Blue Wave Records hi a lut chhuak deuh reng tawh a, country lam hawi ni si, pop ballad lam nena inpawlh deuh a ni a, ngaihthlak manhla tak a ni.

Backing vocal-ah Dr. Zoa aw mawi tak ngaihthlak tur a awm dawn bawk a, Pensy chuan backing vocal lama puitu hnenah hian lawmthu a sawi nghal bawk.

Video chu Peter Video Production kut chhuak a ni a, music video awmze nei tak a ni nghe nghe.

Pensy hian he hla hi Zonet lamah nizan khan a tichhuak tawh a, a YouTube channel lamah a dah thuai dawn bawk a ni.

He hla bakah hian Blue Wave Records lam nen hian hmachhawp an nei nual bawk a, Andrew Laltlankima nen pawh hla tihchhuah dun an tum mek niin Vanglaini chuan thu a dawng bawk.