Charles Darwin-a notebook ruk bo pe let leh

English biologist lar tak Charles Darwin-a'n a kut ngeia a ziah a notebook pahnih chu ruk bo a nih aṭanga kum 22 hnuah mak tak maiin Cambridge University-ah an pe let leh.

Savun hmanga tuam lehkhabu te pahnih hlu tak maiah hian Darwin-a'n 'tree of life' lem a ziahte pawh a awm a, tu tih hriat lohin gift bag senno chhungah he lehkhabu pahnih hi dahin Cambridge University hnenah hian an pe let leh a ni. A pe lettu chuan Easter hlim taka hmang tura librarian-te a duhsakna thuziakte pawh a dah tel.

Lehkhabu pahnihte hi kum 2001 khan a bo tih hriat chhuah a ni a, mahse staff-te chuan hmun dangah an dah sawn a nih ringin lehkhabu, map leh manuscript maktaduai 10 lai library-a an dah chu uluk takin an zawng kual ta a, October 2020 khan a bo thu chu report a ni ta a ni.

Police-te chuan ngawrh takin zawn hna an ṭan nghal a, Interpol lamte pawh hriattirin khawvel pumah a bo thu an puangzar ta a, chumi aṭanga kum khat leh a chanve dawn a liam hnuah chuan an rawn dah let leh ta a ni. Lehkhabu pakhat zawkah chuan Darwin-a seminal 1837 'Tree of Life' lemziak hlu tak pawh a tel.

Lehkhabu an dah letna hmun hi CCTV awm lohna hmuh a ni a, thuziakte chu tihchhiata a awm loh thu leh hmelhemna a awm loh thu librarian-te chuan an sawi.