Copyright case-ah Ed Sheeran-a'n thiam chang

British singer Ed Sheeran chuan a hla hit 'Shape of You' chungchanga a laka thubuai an thehluhah thiam a chang.

Ed Sheeran-a'n kum 2017-a a tihchhuah a hla hit tak mai 'Shape of You' kha artist Sami Chokri leh Ross O’Donoghue-te chuan khingin kum 2015-a an hla tihchhuah 'Oh Why' entawnah an puh a ni. Hemi chungchanga thubuai hi Nilaini khan London High Court chuan ngaihtuahin thutlukna a siam a, Sheeran hian thiam a chang ta a ni.

Judge Antony Zacaroli chuan hla chu uluk taka an zirchian hnuin entawna an puh lai ‘OI (Oh I) Phrase’ leh ‘OW (Oh Why) Hook’ chuan inanna deuh nei tho mah se danglamna pawh a nei a ni, a ti a, 'Sheeran hian 'Shape' phuahna tur hian 'Oh Why' hi a copy lo tih chu kan pawm dan a ni e,' a ti bawk.

Sheeran hian kum 2017-a 'Shape of You' a tihchhuah khan a hlawhtlinpui nghal rem rem hle a, a tihchhuah kumah phei chuan khawvel puma digital song lar ber a nih bakah YouTube lamah pawh thlirtu tluklehdingawn 5.6 chuang a nei tawh a ni.