Hontrade Ṭhazual Lengzem ; A zawna No.1 hauhtu Manuna & Feli Fanai

Hontrade International ṭha­zual Lengzem chart-ah Manuna leh Feli Fanai te nekchhuak zo an la awm lo a, a zawnin No.1 an hauh ta.

Manuna leh Feli Fanai te hian October thla khan 'I leng dun zel ang' tih hla an tichhuak dun a, he hla hmang hian Ṭhazual chart-ah dinhmun sang ber an luah mek.

He hla hi Mahmingi Rawite phuah niin, Mizo Lengzem singer zinga kan neih ṭhat pahnih te hian an sa nalh hle. Rimawi lamah chuan ani aia ṭha an awm chuang lo ang tih hial tur Lal K Sailo chuan music track hi nalh takin a siam sak a, video hmuhnawm tak mai hi ROAR Video Production kutchhuak a ni bawk.

Tlangzarh a nih aṭangin Ṭhazual chart-ah kan hmu nghal chat a, zawi zawia hma sawn zelin No.1 hi an kai ta a ni. Tun lai lengzem hla-ah chuan sakpui hlawh ber te zinga mi niin, thlan hlawh ber a ni pawh hi a mak lo.

Tun ṭumah hian Mizo Idol star Mathlenga chuan 'Tawn thar D' tih hla hmangin pahnihna a rawn hauh a, a zai ngainatu an la tam hle tih a lang. Mathlenga hi chart-ah a mikhual tawh lo hle a, dinhmun sang tak tak a lo luah fo tawh a ni.

Ticos a inlar
Mizo Idol star Ticos Dar­hming­liana chuan a dinhmun sawh nghet zelin, a vawi khat nan top 3-ah a rawn inhlangkai. Ticos-a hi chart hmasa lamah khan pasarihna a ni a, tun ṭumah hian a rawn invawrh dawrh a ni.

Tleirawl te star rawn Ticos hian a hla thulkhung 'Lungmawl Duhsam' tih chu a hlawhtlinpui mek a, a zai ngainatu an tam hle tih a lang. Dinhmun sang ber thleng turin hmasawn hret a mamawh a, tun ang renga a kal chuan No.1 a hauh thuai theih a beiseiawm hle a ni.

Ṭhazual chart-ah dinhmun sang ber pawh lo luah tawh Zauvi chu palina a ni a, a hnuaiah hian Dj Lalvenhimi a awm ve thung. Dj-i hian 'Ni thar duhawm' tih hla hmangin pangana hi a hauh a ni.

Feli Fanai chuan a hla thar 'Tuman an tluk lo' tih hmangin parukna a a hauh tel bawk a, pasarihna chu Rpa Ralte a ni. Top 10-ah hian Essy, Manuna leh Tza Ralte te chu an lang bawk.

Hontrade International Ṭhazual Lengzem Top 10
1. Manuna & Feli Fanai - I leng dun zel ang
2. Mathlenga - Tawn thar D
3. Ticos Dara - Lungmawl Duhsam
4. Zauvi - Thenrual Hlui
5. Dj Lalvenhimi - Ni thar duhawm
6. Feli Fanai - Tuman an tluk lo
7. Rpa Ralte - I la hria em
8. Essy - Hringnun
9. Manuna - Fam min chan san
10. Tza Ralte - Krismas nun