Krismas hla nen Jojo-i a rawn comeback

Youth Icon aṭanga Zo­ram mipuiin kan hmel­hriat Josephine Lal­ramengi Chhakchhuak (Jojo-i) chu hun eng emaw chen a reh vang vang hnuah Krismas hla nen a lo cameback leh ta. Jojo-i hian Krismas hla ṭha tak mai 'Chrismas Chibai' tih chu min rawn hlui ta rup mai a, zanin hian Zonet Zawlbuk-ah tichhuah a ni ang.

'Chrismas Chibai' tih hla hi Rualthankhuma Chhakchhuak phuah niin, 1988 daih tawha a phuah kha a ni. Lungngaihna te leh manganna te dah ṭha a, kan ngahhlelh em em Krismas lal zawng zawngte Lal ber Isua Krista piancham lo thleng tur hlim tak hmuak tura infuihna hla ṭha tak a ni. He hla hi a phuahtu bakin an la sa lo a, a fanu Jojo-i hian music video siamin a rawn sa thar ve leh ta a ni. Music track mawi tak mai hi Lal K Sailo leh Myztic Sailo te kutchhuak a ni a, recording leh video hi Lal K Sailo hian a siamsak bawk.

Jojo-i hian kum 2014 khan Lalṭhakima nen 'Tiam tlat e' tih hla an tichhuak a, hemi hnu hian a reh zui ta vang vang a ni. Tun hma lama a la tihchhuah ngai lem loh Krismas hla nen a rawn kir leh ta a, kumin a music video hmasa ber a ni nghal bawk.

Hetih chhung hian Jojo-i hi a awm mai mai bik lo a, Chanmari Branch YMA ten an Diamond Jubilee puala Beat contest an buatsaih ṭum khan Char Namber band-ah vocalist niin, pathumna a nih pui a ni. Char Namber band te hi Temple Corps SAY ten December 24-a Coffee Nite an buatsaih turah an perform dawn bawk a ni.

Jojo-i hian kum 2015 khan pasal a nei a, tunah hian fa pathum a nei tawh a ni. Heti chung hian rimawi lam chawlhsan mai a tum lo hle a, music video tihchhuah tumin hma a la leh mek a ni.