Isha & Anand pre-wedding ceremony-ah Beyonce Knowles a perform

Media hrang hrang ten an lo tarlan tawh ang ngeiin American singer lar Beyoncé Knowles chuan India leilung a rap ta a, Pathianni khan Udaipur-a, Isha Ambani leh Anand Piramal te inneih urlawkna ceremony-ah a perfom. Beyonce hian lawm a hlawh hle a, nimin khan US a pan leh nghal a ni.

Kum 37 mi Beyonce hian India thuam a inbel a, mit a la kher mai. A inchei dan hi Grammy Award 2017 sem ṭuma a inthuamna nen pawh khan a inang hle a, a thlalak pawh social media lamah a tarlang nasa chuai chuai hle. 'Halo' singer hian a hla hit eng emaw zat a sa a, chung zingah cuan Crazy in Love, Perfect, Run the World (Girls), Deja Vu leh Single Ladies (Put a Ring on It) te pawh a tel.

Isha leh Anand pre-wedding ceremony-ah hian khawvel huap pawha mi challang tak tak an kat nuka, chung zingah chuan US former First Lady Hillary Clinton, pawh a tel a ni. Bollywood star - Shah Rukh Khan, Sal­man Khan, Aamir Khan leh Aishwarya Rai Bach­chan te pawh an inlan a, hmanni lawka innei Ranveer Singh leh Deepi­ka Padukone te hmel hmuh tur a awm bawk.

Reliance Industries chairman Mukesh Ambani-a fanu Isha Ambani leh sumdawng hausa fa Anand Piramal te hi vawiin hian Mumbai-a Ambani te chhungkaw chenna Antilia-ah an kutsuih dawn a ni. An inneih tur chungchang hian ngaihven a hlawh hle a, media lamah pawh an tarlang nasa hle.

India ram mai ni lo, Asia khawmualpuia hausa bera an sawi ṭhin Mukesh Ambani chuan a fanu pasal neihna turah hian a sumbawm te zau taka hawn a tum a, a ropui thei ang bera buatsaih a tum a ni. An ṭhian hnai leh VIP te tan thlawhtheihna 200 zet a ruahman a, an vah velna turin luxury car 1,000 chuang an chhawp sak dawn bawk a ni.