Ukraine mipuite thlawpna lantirna turin Pink Floyd-in hla thar tichhuak

British psychedelic band Pink Floyd chuan kum tam tak hla thar an tihchhuah tawh loh hnuah Ukraine mipuite an thlawpna lantirna turin nimin khan hla thar 'Hey Hey Rise Up' an tichhuak.

An hla thar tihchhuah tur chungchang hi Ningani khan thuchhuah siamin an tarlang lawk a, kum 1994 hnua an hla thar tihchhuah leh hmasak ber niin he hla aṭanga an sum hmuh chhuah zawng zawng chu Ukraine-a mihring tihduhdahna tuarte tan an hlan vek dawn tih an tarlang.

Guitarist David Gilmour leh drummer Nick Mason-te chuan an lo thawhpui tawh fo ṭhin bass player Guy Pratt leh keyboardist Nitin Sawhney-te chu he hlaah hian an thawhpui a, anni pahnih bakah hian Ukrainian band Boombox vocalist Andriy Khlyvnyuk chu an thawhpui bawk.

An hla thar hi March 30-a an record tawh kha niin Gilmour chuan,"Khawvela ram thiltithei ber pakhatin mipui rorelna ram ralmuang tak beia an mite eng emaw zat an thahna hian mi tam tak thin a tirim hle a ni," tia sawiin Ukrainian singer an thawhpui Khlyvnyuk pawh hun lo la awm leh turah pawh thawhpui leh a beisei thu a sawi.