Ṭhakima Khiangte ft. Zaii Z Chhakchhuak Mangtha Nun Hlui Duhawm

Mizo Rock Fans-te tan thu thar lawmawm hriat tur a awm e. Tun aṭanga rei loteah Local Channel lamah leh YouTube lamah hmuh theih turin Juggernaut guitarist Ṭhakima Khiangte leh Zaii Z Chhakchhuak thawkdun chuan hla thar “Mangtha Nun Hlui Duhawm” chu an rawn tichhuak dawn.

Mizo ṭhalai Heavy Metal lama tui te tan ngaihthlak tur hla thar a van em em laiin Juggernaut guitarist leh Zaii Z Chhakchhuak-te hian Metal hla ṭha tak mai an rawn chhawp chhuak dawn a, ngaihthlak a manhla hle ang tih a rinawm.

Ṭhakima Khiangte hian hun rei tak music a play tawh loh hnuah recording lam buaipui chho ve lehin zaithiam thar ṭha em em mai Zaii Z Chhakchhuak thawhpuiin Mizo rimawi khawvelah sulhnu a rawn nei ve leh dawn a, Zofate tan rimawi rawn hnutchhiah ve leh ngei an tum a ni. An hla rawn tih chhuah tur hi kum 2016 kuma phuah tawh niin tunah chuan music video nen an rawn tichhuak thei dawn ta a, live music leh rock music lama tuite tan chuan hmaih phal chi a ni lo ang.

He hla hi Rock ballad leh New Wave of British Heavy Metal(NWOBHM) style inchawhpawlh niin, Classic Rock style-a arrangement hi siam a ni a, Mizo ṭawng ngei a phuah Heavy Metal hla kan neih tlem te zing a mi a nih a rinawm.

Recording hi Tluangtea Hnamte (Westend Studio, Tuikual South) hnena tih a ni a, videographer atan hian Anthony WOWv hman niin, video hi Zodina Sailo sponsor a ni bawk a ni.