Maruati, Hlimhlimi, Zorema, Jonathan-te Hla thar 'Lalpan min hria'

An hming han chhiar ringawt pawh hi Zofa zingah chuan tute nge an nih sawi nawn a ngai tawh awm lo e. Tunlai Gospel singer kan neih ṭhat ber zinga mite pali- Maruati Hnamte, Hlimhlimi, Zorema Khiangte leh Jonathan Lianhna-te thawkho chuan Inrinni zanah khan hla thar 'Lalpan min hria' tih an tichhuak.

Maruati, Hlimhlimi, Zorema leh Jonathan-te hi ṭhian inkawmngeih tak an ni a, a mimal ang ṭheuh pawha kan top artist-te pali thawkhoin hla an tihchhuah hi Zorema Khiangte YouTube channel-ah duh hun huna hmeh chhuah theihin a awm tawh.

He hla hi an pali-a an phuah ho a ni nghe nghe a, " 'LALPA'N MIN HRIA' He hla tlawm tak hi kan ṭhian pali kaltlanga Lalpa inpuanna hla a ni a, ngaithlatu zawng zawngte'n thlarau leh tisa lama hlawkna kan chan ngei theih nan Lalpa'n malsawm vek che u rawh se.

Lei leh van Lal, engkim siamtu, thil engkim ti thei meuhin nang leh kei min hre ve ringawt hi a makin a ropui asin. Khawvela lalte, roreltute, mi lian ber berte hian nang leh kei hi min hre lo pawh a ni maithei, mahse he hla kaltlang hian hei hi i thinlungah lo hre thar leh thin ang che, 'Lalpa'n nang leh keihi min hria'.

Lalpa chauh ropui rawh se." tiin YouTube caption-ah chuan an ziak a ni.

Zaithiam tak tak zaiho hi a fuh kher lo. Mahse tun ṭuma kan zaithiam palite zaiho erawh hi chu a ngaihthlak tlak a, an zai nung bawk a, an music video thar hi thlira ngaihthlak a manhla hle.