Academy event-a Will Smith inlan kum 10 chhung khap

Lemchan thiam Will Smith-a'n Oscars ceremony-a Chris Rock a ben thubuai kalzelah Academy of Motion Picture Arts and Sciences chuan Will Smith chu Oscars gala leh Academy event dangah kum 10 chhung a tel an khap.

Academy chuan thuchhuah an siamah hemi chungchang hi tarlangin,"Oscars Awards vawi 94-na chu zahawm lo tak leh pawm harsa taka stage-a Smith chet danin a tilangmawi lo vek a ni," an ti.

Will Smith hian a khawsak dan avang khan thupha a chawi tawh a, Academy aṭang pawhin a ban thu a lo sawi tawh bawk. Academy lam hi Zirtawpni liam ta khan Will Smith khawsak dan chungchangah virtual-in an inhmukhawm a, chumi hnuah chuan Will Smith Academy event-a kum 10 chhung khapna hi an puangzar ta a ni. Smith tel an khapna chu Oscars-a inlante leh mikhualte humhimna tur anih bakah Academy-in rin a hlawh leh theihna tura ti an nih thu thuchhuah an siamah chuan an tarlang tel.

Chris Rock chu lawmthu an hrilh nghal bawk a, khatiang thil danglam tak a thleng chung pawha pangngai taka a khawsa zui thei kha an fak hle.

Will Smith hian Academy aṭanga a ban thu a puanzarnaah khan Academy thutlukna engpawh a pawm thu a lo sawi tawh a, a chet dan hmangin Academy rinna a phatsan tih a lo sawi tawh bawk a ni.

Academy-in an chunga hremna a lekkawh tawh hi tlemte an awm a, mi pali- producer Harvey Weinstein, actor Bill Cosby, director Roman Polanski leh cinematographer Adam Kimmel-te chu mipat hmeichhiatna kawnga an chet dan avangin an lo hrem tawh a, kum 2004 khan lemchan thiam Carmine Caridi chu screener video an pek a lo pirate avangin an lo hnawt chhuak tawh bawk.

Oscar awards laklet sak pakhat an nei tawh bawk a, kum 1969-a best documentary awards an pek 'Young Americans' chu a award dawn kuma tel thei lo a ni tih an hriat chhuah leh avangin an lak letsak a ni.