Bollywood Twitter-ah #IStandWithAliaBhatt a lar

Sushant Singh Rajput thihnain Bollywood a nghawrnghing a, nepotism vanga sawisel hlawh an tam. Gully Boy star Alia Bhatt chu sawisel tawk langsar a ni a, Instagram lamah follower 500K vel a hloh tawh a; Twitter lamah erawh Alia Bhatt thlawptute an rawn inlar ve leh thung.

Sushant Singh Rajput a uina thu a post vete chuan thlawpna lam aiin sawisel a hlawh a, fan tam tak chuan Alia Bhatt sawiselna an post nasat bakah ṭhenkhat phei chuan unfollow turin midang an ngen thul. Hemi vang hian ni thum chhung lekin follower 500K vel a hloh a, mi maktaduai 48.9 follower nei ṭhin khan mtd 48.2-ah a tlahniam a ni. Ṭhenkhat phei chuan a channa film boycott lam an sawi mawi ṭan.

Hetiang karah hian Twitter lamah erawh Alia Bhatt thlawptute an inlar ṭan a, #IStandWithAliaBhatt hmuh tur a tam thung. Sushant Singh Rajput thihnain Bollywood-ah nghawng a la nei lian zel dawn niin a lang a, tunhma aṭanga mi tam takin an lo auchhuahpui tawh ṭhin nepotism chu tunah chuan India rama thumal lar ber zinga mi a ni mek.