October 9-ah FIFA 21

EA Sports chuan an football video game chhuanvawr FIFA 21 chu October 9-ah an tlangzarh dawn tih an tarlang.

EA / Origin Access sub­s­cri­ber i nih erawh chuan hei aia hma hian i khel thei dawn thung a, chumai a ni lo, vanneihna dangin a la hmuak che. FIFA 21 edition premium zawk i khel thei dawn bawk.

Mizo ṭhalaite pawhin kan tuipui FIFA game thar tur hian ngaihven a hlawh tawh viau a, PC-ah chuan Origin leh Steam-ah a khelh thei ve ve dawn a, FIFA 21 Xbox leh  PS4 copy order-te chuan  Xbox Series X leh PS5 copy a thlawnin an dawng thei dawn a nih hmel.

EA Sports chuan FIFA 21 an tihchhuah hunah chuan “feel next level” an lo tiam tawh a, visual bakah player movement-ah pawh improvement nasa tak a awm dawn. FIFA 21 hi a tak anna kawngah bung thar kaina niin an sawi.

August thla hian chiang zawkin game feature chu an la tarlang leh dawn tih sawiin gameplay, Career Mode, Volta Football, Pro Clubs, leh Ultimate Team-ahte pawh thil danglam a awm dawn.

FIFA hi a tlangpuiin kum­­­dangah chuan Sep­tember-ah an tlangzarh ṭhin a, kuminah erawh hri leng vang a ni mahna, Octo­ber-ah hian an tlangzarh dawn a ni.

FIFA 21 “Standard Edition” chu XBox One-ah chuan Rs. 3,990 man a ni dawn a, PS4 leh PC-ah chuan Rs. 3,999 man a ni dawn thung. FIFA 21 “Champions Edition” chu a man a to hret dawn a, XBox One-ah  Rs. 5,490 a nih dawn laiin PS4 leh PC-ah chuan Rs. 5,499 man a ni ang. “Ultimate Edition” chu XBox One-ah chuan Rs. 6,490 man a ni dawn a, PS4 leh PC-ah chuan Rs. 6,499 man a ni thung ang.

 “Champions” leh “Ultimate” Edition hi an tlangzarh hma hret dawn a, October 6-ah an tlangzarh dawn a ni.

PS4 leh Xbox One-a EA Access subscribe-te chuan October 1 aṭangin an khel thei dawn a, PC-a Origin Access subscribe-te pawhin October 1 aṭang thoin an khel thei dawn a ni. EA / Origin Access subscriber-te hian EA game an lei apiangah 10% discount an nei thei dawn niin an tarlang bawk.